موتر چلوونکي وایې هغه تشې لارې چې په تورخم اوړي، ټرانسپورت او کمیسارۍ ترې زرګونه کلدارې اخلي.
یو شمېر موټر چلوونکو وایي، په ورځو ورځو يې انتطار وکړ خو بیا هم په قانوني شکل د تللو نوبت ور ونه رسېده.
خو چارواکي بیا د موتر چلوونکو تورونه ردوي او وایي پيسې یې ندي اخسیتي.
په تورخم ښارګوټي کې ولاړې سلګونه لارۍ له تورخم هاغې غاړې د اوښتو انتظار باسي.
موټرې وروسته له هغې اېسارې پاتې دي چې د پاکستان له لورې لار په یو طرفه ډول پرانېستل شوه.
اوس نیوکې دادي چې ګنې هغو موټرو ته د اوښتو اجازه ورکول کېږي چې پیسې ورکوي.
موټر چلوونکو شمشاد سره په خبرو کې ویلي چې چارواکي له دوی نه پیسې اخلي او بیا ورته د تللو اجازه ورکول کیږي.
یو تن لارۍ چلوونکی وایي: ((ټولې لارۍ ولاړې دي، ۷۰ زره ۸۰ زره ټرانسپورټ او سرحدیانو ته [سرحدي ځواکونه] ورکوي او بیا لاریو ته مستقیم په سرک د تلو اجازه ورکول کیږي.))
د تورخم کمیسارۍ چارواکي خبرو ته نه حاضرېږي خو د ټرانسپورت رییس بیا وایي چې په ناقانونه د پیسو اخیستلو مخنیوی کوي.
د ننګرهار د ټرانسپورټ رییس خان وزیر وایي: ((زه دا اطمینان درکوم، چې دغه سړی [ناقانونه پيسې اخیستونکی] هر څوک چې دی، که چیرې ماته دغه مامور په ګوته کړي، ان شاءالله میډیاو ته ټلویزیون ته به یې مخامخ ودروم او مخ به یې ور تور کړم.))
د ګمرک رییس هم په دومره شمېر کې د موټرو اېسار پاتې کېدو ته اندېښمن دی.
نصر الله صاحبزاده وایي چې ګڼه ګونه به د لارې بندېدو لامل هم شي.
صاحبزاده وایي: ((دې په خاطر چې د ټرانسپورت هغه جدي مسله چې ده، دا حل شي، او دغه ستونزه ډېره زیاته نشي، ځکه چې که د ټرانسپورت د بندېدو ستونزه زیاته شي، امکان دې ولري چې دغه نقطه بنده شي، نو بیا به نه موټر ځي او نه به راځي. نو د دې لپاره مونږ شپه او ورځ هلي ځلي کړي دي. د کمیسارۍ مدیریت ته او تورخم کې د ټرانسپورت مدیریت نه مو جدي غوښتنې کړې دي، ورسره مو کار کړی دی چې تاسو کوشش وکړئ چې د موټر نوبت مراعت کړئ.))
ننګرهار د والي دفتر هم وایي چې د یکشنبې له ماښام وروسته به د لاریو اوښتو اجازه ورکړي.
پاکستان وروسته له هغې له افغانستان سره خپلې دروازې وتړلې چې په سیمه کې د کرونا ویروس پراخېدو وېره خپره شوه.
