د بې سرحده ډاکټرانو ټولنې د دشت برچي په سل بستریز روغتون د برید په اړه د څیړنو غوښتنه کړې ده.
دغه سازمان تېره ورځ په خپل راپور کې لیکلي، د دشت برچي پر روغتون د برید درې اوونۍ تیري شوي خو تر اوسه دوی نه پوهیږي چې چا او ولې په دغه روغتون برید کړی دی.
دغه سازمان وایي، موږ اړتیا لرو چې پوه شو، ناروغان او ډاکتران مو چا وژلي او ولې یې زیږنتون په نښه کړی.
په راپور کې دغه راز راغلي، بې پولې ډاکټران باید ددغه برید عاملان وپيژني او د برید شرایط او انګیزه باندې هم پوه شي څو مالومه شي چې بې پولې ډاکټران او کارکوونکي خو به د برید موخه نه وي.
دغه سازمان په ورته وخت کې خبرداری ورکړی که د برید په تړاو څېړنې ونه شي نو ستونزمنه به وي چې دشت برچي سیمه کې دوی خپل فعالیتونو ته دوام ورکړي.
د تیرې ثور میاشتې په ۲۳ نیټه د کابل ښار دشت برچي سیمه کې پر سل بستریز روغتون برید وشو چې د کورنیو چارو وزارت د ورکړل شویو شمېرو له مخې ۲۴ تنه په کې ووژل شول.
