رسنيو ته د عبدالله له لوري منسوب طرحه ثبات او همپالنې ډلې رد کړه.
د اروپايي ټولنې له هغه خبرداري وروسته چې ښاغلى عبدالله دې سياسي کړکېچ ته د پاى ټکى کېږدي سم لاسي ټولنيزو رسنيو کې داسې يوه طرحه لاس په لاس شوه چې ثبات او همپالنې ډلې ته په کې د زياتو صلاحيتونو غوښتنه شوې.
طرحه کې د سولې په محوريت د اجرايي صدراعظمۍ پر جوړېدو ټينګار شوى خو د عبدالله عبدالله ویاند دغه طرحه رد کړې او وايي چې تر اوسه یې هیچا سره طرحه نه ده شریکه کړې.
د ثبات او همپالنې ټيم وياند امید میثم داسې وویل (( تر اوسه پورې مو چا سره طرحه نه ده شریکه کړې، خو د دواړو ټیمونو ترمنځ مذاکراتو کې پرمختګ شوی دی او نږدې ورځو کې به نهايي شي.))
عبدالله سره د سياسي کړکېچ پرحل د ولسمشر مرستيالان کار کوي او د ولسمشر غني د دویم مرستیال دفتر وايي د ولسمشر غني او عبدالله عبدالله ترمنځ سیاسي کړکېچ به ډیر ژر پای ته ورسیږي.
دانش ویلي، عبدالله به د ملي پخلاینې د عالي شورا ریاست په غاړه واخلي
ولسمشر غني وړاندې دوه سرى حکومت رد کړى دى خو واک کې د عبدالله شریکولو لپاره هغه ته د سولې اړوند چارو مشري یې منلې ده.
په ټولنيزو رسنيو کې هم د اجرايي صدراعظمۍ په سر بحثونه ګرم دي.
نړىواله ټولنه د سياسي کړکېچ په ژر پاى ټينګار لري او دوام په اړه يې افغانستان سره د مرستو بندېدو خبردارى ورکړى اوس دا دواړو سياسي مشرانو پورې اړه لري چې افغانستان له دې وضيعت کوم لور ته بيايي.
