د ملي امنیت شورا ویلي چې سل تنه نور طالب بندیان به نن پنجشنبه خوشې شي.
تېره ورځ هم افغان حکومت سل تنه طالب بندیان له بنده خوشې کړي و.
د بندیانو پر سر د افغان حکومت او طالبانو اختلاف
د ملي امنیت شورا دفتر تیره ورځ (چهارشنبه، د وري ۲۰مه) سل طالب بندیان خوشي کړل، خو طالبانو بیا ددغو بندیانو خلاصون ندی تائید کړی.
افغان حکومت ویلي چې دوی سل تنه بندیان د دوی عمر، روغتیایي وضعیت، د بند مودې او د کرونا وېروس ګواښ ته په کتو خوشې کړي دي. افغان حکومت دا هم وایي چې دوی هغه طالب بندیان چې په لویو بریدونو کې یې لاس درلود، نه خوشې کوي.
د بلې خوا، طالبانو بیا ویلي چې د افغان حکومت له لورې له بنده ازاد شوي سل تنه بندیان له ټاکل شوې پروسې سره سم نه دي خوشې شوي او دوی خپل پلاوی بیرته ستون کړی دی.
دا په داسې حال کې ده چې طالبانو څه موده وړاندې خپل درې کسیز پلاوی د بندیانو د خلاصون لپاره کابل ته استولی وه. خو طالبانو ورسته له هغې چې د بندیانو په تړاو مذاکرات یې له افغان حکومت سره کومې پایلې ته ونه رسیدل، خپل پلاوی بیرته ستون او افغان حکومت یې د پلمو په جوړولو تورن کړ.
خو افغان حکومت بیا د طالبانو دا ادعا رد کړه او وې ویل چې طالبان د هغو ۱۵ تنو د خوشي کیدو غوښتونکې دي چې په لویو بریدونو کې لاس درلود.
امریکا هم په کراتو په افغان حکومت غږ کړی چې طالب بندیان دې د شوې هوکړې پر بنسټ خوشي شي، خو افغان حکومت بیا د طالب بندیانو خلاصون اوربند یا هم د تاوتریخوالي کموالي پورې مشروط کړی.
په ورته وخت کې، د افغان حکومت په وینا، نن به هم ۱۰۰ تنه طالب بندیان له بنده ازاد شي.
خو لا تر دې دمه معلومه نده چې طالبان به ددغو سلو نور بندیانو خوشي کیدل تائید کړي او کنه؟
