د افغانستان دفاع وزارت تیره ورځ د یوې اعلامیې په خپرولو سره ویلي دي چې طالبانو د نفوذي کسانو په مرسته په زابل کې د ملي اردو یوولس او د پولیسو شپږ سرتیري وژلي دي.
خو ځينې سرچینې چه نه غواړي نوم یې واخستل شي، وایي چې د جمعې د ورځې په برید کې شاوخوا ۲۰ سرتیري وژل شوي دي.
طالبانو بیا د یوې خبر پاڼې په خپرولو سره ویلي دي چې دغه برید دوی کړی او په پوسته کې شته ټول سرتیري يې وژلي دي.
د طالبانو دغه برید په کور دننه او بهر غبرګونونه راپارولي دي:
افغان ولسمشر محمد اشرف غني دغه برید غندلی او ویلي یې دي چې د وسله والو طالبانو دغه برید او دې ته ورته نور بریدونه نه یوازې د سولې فرصت له خطر سره مخ کوي، بلکې د دوی پر ضد به د ولس کرکه او نفرت لا راوپاروي.
په ورته وخت کې، په کابل کې د امریکا سفارت هم ددغه برید غندنه کړې او ویلي دي چې د نوي کال په لومړۍ ورځ او بیا په داسې وخت کې چې د نړۍ هیوادونه د کرونا ویروس پر وړاندې مبارزه کوي، د طالبانو دغه ډول بریدونه نفرت پارونکي دي.
په کابل کې د جرمني سفیر پیټر پروګل هم دغه برید غندلی او ویلي یې دي: ((په زابل کې پر افغان ځواکونو د طالبانو وحشي برید سخت خفه کړم. د نوروز په ورځ او بیا په یوې داسې ورځ چې نړۍ د کرونا ویروس له ستونزې سره مخ ده، د طالبانو دغه وحشي عمل سولې ته د طالبانو په ژمنتیا کې جدي شکونه راپورته کوي. د قربانیانو کورنیو او دوستانو ته د زړه له کومې ډاډګیرنه وړاندې کوم.))
په افغانستان کې د ناټو ملکي استازی نیکولاس کی هم په زابل کې پر امنیتي ځواکونو د طالبانو برید غندلی دی.
