ازبکستان د حیرتان دروازه وتړله.
د ازبکستان او افغانستان ترمنځ د حیرتان دروازه د کرونا ناروغۍ د خپریدو د مخنیوي لپاره د تیرې شپې راهیسې تړل شوې ده.
د حیرتان د سرحد کمیسار نور الدین رووفي نن د دوشنبې په ورځ رسنیو ته ویلي، چې د ازبکستان سرحدي ساتوونکو تیره شپه دا سرحد په موقت ډول وتاړه چې له امله یې د ځمکې له لارې د دواړو هیوادونو ترمنځ تګ راتګ ځنډیدلی دی.
هغه وویل چې ازبکستان خپل سرحد د کرونا د ناروغۍ د ویروس د خپریدو له وېرې تړلی دی.
د حیرتان سیمه ییز اوسیدونکي هم وايي چې د سرحد د بندیدو وروسته په سلګونو باروړونکي وسایط په دغه بندر کې بند پاتې دي او د سرحد پرانیستلو ته انتظار وباسي.
وړاندې تر دې ترکمنستان او پاکستان هم په ځينو سیمو کې لارې تړلي دي.
