امریکا ويلي، افغانستان کې د ټاکنیزو مسلو پر ځای دې د سولې لپاره ګامونه واخیستل شي.
د امریکا د بهرنیو چارو وزارت په یوه اعلامیه کې ویلي، افغان حکومت د لوړې مراسمو ځنډول منلي او په وینا یې دغه راز د موازي حکومت جوړولو هڅې هم قانوني نه دي.
د امریکا د بهرنیو چارو وزارت ویلي، افغانستان کې د هر ډول موازي حکومت جوړول د دې هېواد له اساسي قانون سره په ټکر کې دي.
دغه وزارت ویلي، افغان حکومت د ولسمشر د لوړې مراسمو پر ځنډولو موافقه کړې او امریکا ترې مننه کوي.
امریکا غوښتنه کړې چې راتلونکی حکومت دې پراخ بنسټه وي، داسې چې د ټولو افغانانو هیلې پر ځای کړي.
د امریکا د بهرنیو چارو وزارت په اعلامیه کې له افغان سیاسیونو هم غوښتل شوي چې په سیاسي بحثونو کې دې د زور خبرې نه کوي او په نرمۍ دې الفاظ کاروي، څو ګډوډي جوړه نه شي.
په توله کې د امریکا غوښتنه دا ده چې، د ټاکنو پر ځای دې د تلپاتې سولې پر لور ګامونه پورته شي چې له طالبانو سره جګړه ختمه او سیاسي حل لاره وموندل شي.
