ترڅو چې ټول شمول حکومت مشر مالوم نه شي اجرایه ریاست به خپل کار ته دوام ورکوي.
اجرایه ریاست د ارګ خبره رد کړه چې له دې ورسته به اجرایه ریاست نه وي.
قانون پوهان چې دغه پوسټ له پیله غیر قانوني بولي وايي، عمر یې د لوړې تر مراسمو دی.
ځینې نور یې په هېواد کې د بحران لامل بولي او په دې اړه له ولسمشر تمه دا کېږي چې په احتیاط مخکې لاړ شي.
د دوه زره څوارلسم کال ټاکنیزو ناندریو په پایله کې اجرایه ریاست منځ ته راغلی، هغه چې د افغانستان د اساسي قانون پرخلاف جوړشو او عبدالله عبدالله په کې د وزیرانو شورا ناستې په مخ وړلې چې کله کله یې د ارګ پرېکړې هم ویټو کولې.
اوس چې ټاکنو کمېسیون ښاغلی غني د ټاکنو ګټونکی اعلان کړی ارګ ویلي،له دې وروسته اجرایه ریاست نه شته.
خو د اجرایه ریاست ویاند وایي، دوی په خپل ځای پاتې دي.
ولسمشر غني په خپلو ټاکنیزو غونډو کې په زغرده ویلي وو،چې اجرایه ریاست د ده د کارونو خنډ و او نور به دحکومت برخه ونه اوسي.
د حکومت منتقدین په دې باور دي چې په اوس وخت کې داسې اقدامات افغانستان بحران ته بیایي.
دا باور هم کم کېږي چې ولسمشر غني به په خپل دریځ ټینګ پاتې شي چې یو اړخیز حکومت وکړي.
حقوق پوه سبحان الله مصباح وایي، اجرایه ریاست د سیاسي هوکړې پربنسټ جوړ شوی او ترڅو چې نوي ولسمشر لوړه نه وي کړې دا پوسټ به په خپل ځای پاتې وي.
له دې سره په ننګرهار کې د والي ویاندعطاالله خوګیاڼي د اجرایه رییس انځور له دیواله ښکته کړی چې مقابل کې یې د پنجشېر له دروازې د ولسمشر انځور راښکته شوی دی.
دې کار په ټولنیزو رسنیو کې منفي غبرګونونه راپورته کړي او باور داسې ښودل شوی دا د بحرانونو د جوړېدو لامل کېږي.
