تازه تېره شپه د ښار اړوند شوره خاک سیمه کې د ملي اردو یوه پوسته طالبانو سقوط کړې او دیارلس سرتېري يې پکې وژلي دي.
په کندز کې د دوشنبې په شپه د پوځ ۱۳ سرتیرو وژل کېدو پر چارواکو د خلکو نیوکې راپورته کړي.
د کندز ښار اړوند سیمه کې طالبانو د ملي اردو پر یوې پوستې برید وکړ چې په پاېله کې یې ۱۳ سرتیري ووژل شوي دي.
د کندز اوسېدونکي او د خلکو استازي چارواکي ګرم بولي چې په وخت د سرتیرو ملاتړ نه کوي.
د کندز ولایتي شورا مرستیال صفي الله امیري او یو شمېر اوسیدونکو داسې وویل(( په کندز کې د وسله والو مخالفینو تهاجمي بریدونه تر بل هر وخت زیات شوي دي. تیره په خان اباد او چهاردره کې او نن شپه دلته د پوسټې سقوط چې ګڼ شمیر سرتیرو ته په کې مرګ ژوبله اوښتې ده د تشویش وړ خبره ده،،،، وسله وال مخالفین دولتي پوستې سقوط کوي ساعتونه ورسره جګړه کیږي خو له بده مرغه چې کمکي ځواکونه و رته نه را رسیږي.))
وروستیو بریدونو په کندز خلکو سره اندېښنې پیدا کړي چې ورځ تر بلې د افغان ځواکونو د تلفاتو کچه لوړېږي خو مسوولین یې د مخنیوي لپاره اقدامات نه کوي.
په کندز کی د ۲۱۷ پامیر قول اردو مشر محمد علي یزداني هم تلفات مني خو وایي طالبانو ورسره د مخامخ جګړي توان له لاسه ورکړی او غلچکي بریدونه کوي.
محمد علي یزداني داسې وویل (( لکه څنګه چې تاسې په جریان کې یاست وسله وال مخالفین دومره توان نه لري چې پر افغان ځواکونو مخامخ بریدونه وکړي بلکې په ځینو ساحو کې غلچکي بریدونه کوي او یا موقتي چک پاینټ اچوي . زموږ ګزمې د کندز په ټولو ساحو کې ترسره کیږي چې ډيری وخت مخالفینو سره په جګړه اوړي زموږ پلان دا دی چې وړې پوستې په لویو بېزونو بدلې کړو تر څو وکولی شي مخالفین له پښو وغورځوو.))
پوځ د تېرې شپې په برید کې یوازې د ۵ سرتیرو وژل کېدل او د ۳ نورو ټپي کېدل تاییدوي خو طالبان وایي چې ګڼ سرتیري یې وژلي دي.
