د حزب اسلامي مشر ګلبدین حکمتیار وايي، که ټاکنیزو قضایاوو ته په سم ډول رسیدنه ونه شي وطن به د عراق او لبنان له برخلیک سره مخ شي.
د سولې اسلامي عدالت ټاکنیز ټیم مشر اینجنیر ګلبدین حکمتیار وايي، د کمېسیون له پریکړې ناراضه دی او په لوی لاس د حزب د باور له منځه وړو لپاره د دوه زره څلور سوه درویشت محلونو رایې باطلې شوي دي.
حکمتیار دا هم وویل چې د خپلو رایو د دفاع حق لري او چل یې هم ورځي، دا چې څه ډول؟ حکمتیار وویل مناسب وخت کې به ووايي.
حکمتیار د ټاکنیزو کړکیچونو د حل یوه لار دا وښوده چې لانجمنو محلونو کې دې له سره رایه اچونه وشي او د ټولو هغو صندوقونو بیا شمیرنه دې له سره وشي چې د ټاکنیزو ټیمونو داستازو په غیاب کې شوي.
حکمتیار د سولې په اړه وویل، د مخکښه ټاکنیزو ټیمونو او مخکیني ولسمشر حامد کرزي په ګډون د ې د سولې خبرو لپاره سیاسي اجماع جوړه شي.
د حزب اسلامي امیر کابل کې خبري ناستې ته د خبرو په مهال وویل، بهرنیان افغانستان کې سوله نه شي راوستلی دوی باید بین الافغاني خبرو کې هم ګډون ونه لري.
د ښاغلي حکمتیار په خبره سوله ملي قضیه ده، هیڅ فرد او بنسټ ددې حق نه لري چې واک یې په لاس کې واخلي.
د حکمتیار په باور مخکښه درې ټاکنیز ټیمونه او حامد کرزي په ګډون اجماع به وکولی شي د سولې ور اخوا د نورو مهمو قضیو په اړه هم پریکړې وکړي.
