ارګ د امریکا د سفیر پر هغو څرګندونو غبرګون وښود چې ویلي یې دي، له یو میلیون کمو رایو باندې د راتلونکي ولسمشر سیاسي اعتبار به کم وي.
کابل کې د امریکا د سفیر جان باس دنده پای ته رسېدلې او ولسمشر غني هم د وزیر محمد اکبرخان په عالي دولتي مډال نازولی دی.
جان بس چې اوس یې امریکا بیرته د سفر بکس تړلی، وروستیو څرګندونو یې غبرګونونه او اندېښنې راپورته کړي دي.
هغه طلوع نیوز ته ویلي، چې افغانستان کې په یو میلیون رایو ټاکل کېدونکی ولسمشر ښایي ډېر سیاسي اعتبار ونه لري.
خو د دې موضوع په اړه د ارګ غبرګون محتاطانه دی او دا د سفیر خپل نظر ګڼي.
د ولسمشر ویاند مرستیال لطیف محمود داسې وویل (( کېدای شي په ډیموکراتیک نظام کې هر څوک ځانته نظر او دریځ ولري دا چې جان باس څه ویلي دا د دوی شخصي نظر دی ما تاسې سره د دولت نظر شریک کړ.))
سفیر ویلي ، راتلونکی افغان ولسمشر باید نورې ډلې هم واک کې شریکې کړي، خو دا څرګندونې ممکن د حکومت د سیاسي مخالفیینو هغه دریځ پیاوړی کړي چې ټاکنو کې يې ماته خوړلې او د موقت حکومت لپآره یې بحثونه راپورته کړي دي.
د حکومت د رسنیو مرکز پخوانی مشر صفت ساپي داسې وویل (( دغه ډول څرګندونې چې د امریکا سفیر کړي دي په دې مانا دي چې یو مشارکتي حکومت چې په دې وروستیو کې یې ګونګوسې هم دي لار پرانیزي خو د ټاکنو بهیر کې چې تر اوسه څومره پرمختګ شوی دی دا هم تر سیوري لاندې راوستی شي.))
جان باس د ولسمشریزو ټاکنو پایلو ته په خپل تېر غبرګون کې ویلي وو، چې دا یوازې د لومړنیو پایلو اعلان دی.
خو ځینې کابل کې د امریکا د مخکیني سفیر څرګندونې د افغانستان په کورنیو چارو کې لاسوهنه بولي.
ورځپاڼه لیکونکی قریب الرحمن شهاب داسې وویل (( زه فکر کوم چې د جان بس دغه څرګندونې د افغانستان په چارو کې ښکاره لاسوهنه ده، دوی په تیر او اوسني حکومت کې ښکاره لاسوهنې کړي دي خو افغان حکومت ته په کار ده چې امریکا سره په اړیکو کې یو واضیح تعریف اعلان کړي.))
په ولسمشریزو ټاکنو کې نږدې دوه میلونه خلکو برخه اخیستې وه چې په لومړنیو پایلو کې ولسمشر غني له یو میلیون په کمو رایو مخکښ دی.
