د سولې له خبرو سره یو ځای بیلابیلو ولایتونو کې جګړې هم شدت موندلی.
ملي دفاع وزارت د ۲۰۲۰ کال پیل کې د ژمي درې میاشتو کې پر جګړې او بریدونو د شدت خبر ورکړ.
تازه یو امنیتي او دفاعي پلاوی فراه ولایت ته تللی چې د وضعیت ارزونه وکړي.
د مالوماتو له مخې یواځې د سه شنبې شپه د هېواد په شمال شرق کې نږدې شل سرتېري وژل شوي او د دې دوه چنده طالبانو ته هم مرګ ژوبله اووښتې ده.
ملي دفاع وزارت اوړي کې د جګړې د کمښت لپاره ژمني عملیاتو ته دوام ورکوي.
د ملي دفاع وزارت ویاند روح الله احمدزي داسې وویل (( ددې لپاره چې په راتلونکي پسرلي او اوړي کې د دولت مخالف وسله وال کمزوري وي او د جګړې زور یې اوبه شوی وي، ملي دفاع وزارت د ژمي درې میاشتو کې عملیاتو ته دوام ورکوي.))
ملي دفاع وزارت به تر هغې جګړې ته دوام ورکړي تر څو چې په اوربند هوکړه نه وي شوي.
له دې سره پوځي شنونکي ډاډه دي چې ۲۰۲۰م کال کې به د سولې خبرې پایله ورکړي او جګړه به د خبرو له لارې پای ته ورسیږي.
د هوايي ځواک مخکینی قومندان عبدالوهاب وردګ داسې وايي (( د امریکا او طالبانو ترمنځ د سولې خبرې نهايي کیدو ته نږدې دي، او ممکن له هوکړې وروسته بین الافغاني خبرې پيل شي.))
د سولې هوکړه کې د بهرنیو ځواکونو له وتلو سره یو ځای اندیښنې شته چې د بهرنیو مرستې به کمې شي، خو دفاع وزارت ډاډه دی چې راتلونکي څلور کلنه د مرستو ژمنې شوي دي.
ملي دفاع وزارت اوس هم په یولس ولایتونو کې د وسلوالو مخالفینو پر ضد څو ډوله عملیات کوي چې له لاس ته راوړنو یې ډک بولي.
نږدې هره ورځ طالبان او دفاع وزارت یو بل ته د لسګونه کسانو د وژل کیدو ادعا کوي او داسې ښکاري چې سږنی ژمی به جګړه کې کموالی را نه شي.
