د هند لومړي وزیر نرېندرا مودي ولسمشر غني ته د سفر بلنه ورکړې ده.
ولسمشر غني په خپله ټویټر پاڼه کې لیکلي چې نن سه شنبې غرمه یې له نرېندرا مودي سره د ټیلیفون پر لیکه پر ځینو مسایلو خبرې کړي دي.
ولسمشر پر ټوېټر لیکلي، (( زما ګران دوست او د هند لومړي وزیر نریندرا مودي نن غرمه راته زنګ وهلی و، ما او افغان ولس ته یې د ولسمشریزو ټاکنو د بریالي ترسره کېدو او همدارنګه د دغو ټاکنو په لومړنیو پایلو کې د بریا مبارکي راته وویله.))
د ولسمشر غني د ټویټ له مخې نرېندرا مودي په افغانستان کې د افغانانو په مشرۍ د سولې د هڅو ملاتړ ترڅنګ، د مرستو د دوام ژمنه کړې ده.
ولسمشر غني پر ټوېټر زیاته کړې چې په یو مناسب وخت کې به هند ته سفر وکړي او د یو لړ سیمه ییزو او نړیوالو مسایلو په اړه به له نږدې بحث او خبرې ورسره کوي.
