ثبات او همپالنې ټاکنیز ټیم په اووه ولایتونو کې د رایو بیا تفتیش ته اجازه ورکړه.
د یکشنبې په ورځ به په اوه تړل شویو ولایتونو کې د رایو بیا شمیرنه او تفتیش پیل شي .
د بیا شمیرنې دغه بهیر به دوه ورځو کې پایته ورسیږي او کمېسیون به د روانې اونۍ تر پایه لومړني نتایج اعلان کړي .
کمیسیون وايي له لومړنیو پایلو له اعلان وروسته نوماندان کولای شي چې خپل اعتراضونه له شکایتونو کمیسیون سره ثبت کړي .
د ثبات او همپالنې ټاکنیز ټیم مشر عبدالله عبدالله د جمعې په ماښام له خپلو پلویانو وغوښتل چې په هغو اوه شمالي ولایتونو کې دې ټاکنو کمیسیون ته د رایو د بیاشمیرنې او تفتیش اجازه ورکړي چې د دوی له لوري تړل شوي دي .
ټاکنو کمیسیون وايي نوماندان باید خپل اعتراضونه د قانوني لارو وړاندې کړي او هغه ټاکنیز ټیمونه چې اعتراض لري کولای شي چې له لومړنیو نتایجو له اعلان وروسته ټاکنیزو شکایتونو کمیسیون ته یې وسپاري .
سرپل ، جوزجان ، فاریاب ، بغلان ، بدخشان ، تخار او پنجشیر هغه اوه ولایتونه و چې له شاوخوا شل ورځو راهیسې د ثبات او همپالنې ټاکنیز ټیم له لوري پکې د ټاکنو کمیسیون دفترونه تړل شوي وو او بیا شمیرنې ته پکې اجازه نه ورکول کېده .
خلک همدې ورځو کې په تمه و چې کمېسیون به پایلې اعلان کړي، خو اعتراضونو د ټاکنو پاېلې وځنډولې او بالاخره د ټولو رایو د بیا شمېرنې فرصت پيدا شو چې پایلې اعلان شي.
