امریکا په افغانستان کې د نشه یي توکو پر وړاندې مبارزه باندې تر اوسه نهه میلیارده ډالر لګولي
سیګار د امریکا کانګرس ته د خپل درې میاشتني راپور د وړاندې کولو پر مهال ویلي، افغانستان کې له ۲۰۰۲ میلادي کال راهیسې د نشه یي توکو پر ضد مبارزه باندې د مصرف شویو پیسو کچه ۸.۹۴ میلیارده ډالرو ته رسېږي خو نه یوازې دا چې د نشه یي توکو پر وړاندې جګړه بریالۍ شوې نه ده؛ بلکې په دې هېواد کې د نشه یي توکو کښت او کاروبار ډېر شوی هم دی.
راپور کې دا هم راغلي، که څه هم تېر کال د وچکالیو له امله افغانستان کې د کوکنارو په کښت کې کموالی راغلی دی خو لا هم دا هېواد د نړۍ په کچه د تریاکو تر ټولو ستر تولیدونکی هېواد دی.
