د ملګرو ملتونو امنیت شورا په افغانستان کې د ملګرو ملتونو د دفتر یا یوناما ماموریت وغځاوه.
د دغه تړون پر اساس به یوناما په افغانستان کې د ۲۰۲۰ کال د سپټیمبر تر ۱۷ مې خپل ماموریت ته دوام ورکوي.
تر دې وړاندې د تړون پر مسودې اختلاف رامنځته شوی وو چې له امله یې د تړون په اړه د رایه ورکولو پروسه ځنډېدلې وه.
چین ویلي و، که په تړون کې د یوه لار یو کمربند یا د ورېښمو لارې یادونه وه نشي، نو د تړون په حق کې به رایه ورنه کړي.
له دې سره په ملګرو ملتونو کې د امریکا سفیر د چین د دغې غوښتنې مخالفت کړی و او پر چین یې تور پورې کړی و چې په تړون کې خپلو ملي او سیاسي ګټو ته لومړیتوب ورکوي.
د چین او امریکا د اختلافونو له امله د شورا غړي په یو ساده تړون رضا شوي او د یوناما کار یې یواځې د شپږو میاشتو لپاره غځولی دی.
