د طالبانو یو پلاوی له مسکو وروسته ایران ته تللی او موخه یې د همکاریو پراختیا بلل شوې ده.
ایران چې پخوا یې د طالبانو پرضد د شمالي ټلوالې ملاتړ کاوه اوس یې له دې ډلې سره اړیکې ښې دي.
خو تهران ته د طالبانو سفر په داسې یو وخت شوی چې امریکا په ایران د ګوزار لپاره ځان ته پلمې لټوي.
له دې سره سره عباس ستانکزي ویلي، امریکا سره خبرو ته لېواله دي ،خو که امریکایي ولسمشر له خپل دریځ واوړي.
د طالبانو مرکچي پلاوي مشر عباس ستانکزي داسې ويلي ))طالبان له امریکا سره مذاکراتو ته ژمن دي د امریکا ولسمشر دې هم په خپله پرېکړه بیا له سره غور وکړي او د مذاکراتو مېز ته دې راوګرځي.((
د امریکا له اړخه د سولې خبرو له درېدو وروسته طالبانو سره ملګري هېوادونه د بیا خبرو په پیل ټینګار لري، په دې هېوادونو کې ډېر یې د امریکا سیال هېوادونه دي چې په سیمه کې د امریکا حضور سره مخالف دي.
د مشرانو جرګې مشر فضل هادي مسلمیار ټینګار وکړ، چې له ټاکنو وروسته دې د امریکا او طالبانو ترمنځ خبرې بیا پيل شي.
د امریکا او طالبانو د خبرو له پای وروسته د ډېرو ټینګار په بین الافغاني خبرو وو، خو افغان حکومت خپلې خبرې له طالبانو سره ځنډولي دي.
اوس ټینګار دا کېږي که خبرې پیلږي هم د طالبانو او امریکا ترمنځ دې وشي چې د جګړې اړخونه بلل کېږي.
امریکا تر اوسه پورې په خپل دریځ ولاړ ده او د خبرو له ځنډیدو وروسته یې دا پروسه مړه وبلله.
