له کابل پرته ټولو ولایتونو ته د ټاکنو اړوند مواد لېږدول شوي او ټاکنې به د میزان په ۶ مه وشي.
افغانستان کې ولسمشریزو ټاکنو ته شاوخوا لس ورځې پاتې دي چې په تړاو یې ټاکنیز کمېسیونونه بشپړ چمتووالی ښیي.
ولسي جرګې د ټاکنیزو کمېسیونونو مسؤلین د دې لپاره ورغوښتي و چې پوه شي او واوري د ټاکنو په تړاو ستونزې او امکانات څه دي.
د ټاکنو کمیسیون د دارالانشاء مشر حبیب الرحمن ننګ او د شکایتونو کمیسیون مرستیال دین محمد عظیمي وکیلانو ته ډاډ ورکړ، چې له کابل پرته یې ټولو ولایتونو ته د ټاکنو اړوند ټول حساس او غیر حساس مواد استولي او چمتو دي چې د میزان په ۶ مه نېټه ټاکنې ترسره کړي.
مسؤلین وایي، د هېواد په کچه ۵۳۷۳ د رایه اچونې مرکزونه دي چې ۳۳۶۰ یې امن، ۶۷۵ یې تر لوړ ګواښ او ۹۰۷ یې د ټیټې کچې ګواښ لاندې دي.
ټاکنو کمېسیون وایي، باید د ټاکنو شریکان او ملت ورسره همکاري وکړي چې رڼې ټاکنې ترسره کړي.
ولسمشریزو ټاکنو ته د نوماندانو د سرغړونې په تړاو تر اوسه ټول ۶۳ شکایتونه ثبت شوي چې له ډلې یې یوازې په کابل کې ۳۵ ثبت شوي دي.
