د حزب اسلامي مشر ګلبدین حکمتیار وایي، د دایمي سولې لپاره اړینه ده چې بهرني ځواکونه له افغانستانه په حیا او عزت کې ووځي او په وینا یې د دوی د شتون له امله افغانستان کې کوم مثبت بدلون نه دی راغلی.
ګلبدین حکمتیار وایي، د امریکا او طالبانو ترمنځ د سولې خبرو د ځنډېدو په اړه د امریکا پرېکړه ناڅاپي وه او د طالبانو په ګډون هېڅوک یې هم په دلیل پوه نشول.
حکمتیار وایي، بهرني ځواکونه دې له ځان سره د اوسني حکومت مشران هم یوسي، ځکه په خبره یې اوسني مشران بهرني پاسپورټونه او ګرین کارډونه لري او اولادونه یې بهرنیو هېوادونو کې دي، نو سخته به نه وي چې له افغانستانه ولاړ شي.
هغه وایي، د طالبانو او امریکا لپاره له مذاکراتو پرته بله د حل لاره نشته او ښه به دا وي چې امریکا بیرته خبرې پیل کړي.
