په امریکا کې د افغانستان سفیره رویا رحماني وايي، اوربند او افغانستان ته ثبات راتلل، افغانستان کې د تل پاتې سولې لپاره لومړني ګامونه دي.
رحماني چې تیره ورځ یې د امریکا د سولې انسټیټيوټ کې خبرې کولې وویل، نه شي کیدای چې اوسني وضعیت کې د سولې پر مسله باور جوړ شي.
هغې همداراز ټینګار وکړ یواځې د طالبانو ګواښ نه دی چې افغانستان ور سره مخ ده بلکې د مخدره مواد تولید او قاچاق چې بلاخره نورو هېوادونو او ان امریکا ته هم لار پیدا کوي یو لوی ګواښ دی.
په ورته وخت کې ناټو کې د امریکا پخواني سفیر دوګلاس لوټ ویلي، له اتلس کلنې جګړې و روسته امریکا او متحدینو ته یې دا په ډاګه شوې چې دا جګړه پوځي حل نه لري.
دغه متقاعد امریکايي جنرال ویلي، باورلري چې متحده ایلات او طالبان به بلاخره سولې خبرو ته کیني.
د هغه په باور طالبان به همداراز افغان حکومت سره خبرې وکړي خو دا کار وخت ته اړتیا لري.
تیره اونۍ د امریکا ولسمشر ډونالډ ټرمپ له طالبانو سره د خبرو درولو وروسته وویل، طالبانو سره د دوی خبرې مړې شوې.
