د ترکیې ولسمشر اردوغان وايي، له روسیې او امریکا سره یې دا خبره شریکه کړې چې د فرات سیند څنډو کې تصفیوي عملیات کوي.
اخوا د سوریې ایدلیب ښار کې د اوربند له اعلان وروسته متحدو هیوادونو د سترو خوندي ځایونو جوړولو خبر ورکړی دی.
ترکیه وايي، د دغو عملیاتو موخه یې د فرات سیند څنډو ته د کردي ځواکونو له منځه وړل دي چې ترکیې ته یې ګواښ پیښ دی.
تر اوسه په دې عملیاتو کې زیات کردي ځواکونه له خپلو سیمو وتلو ته اړ شوي او ځپل شوي دي.
د ترکیې ولسمشر رجب طیب اردوغان وايي دا خبرې یې تازه له روسیې او امریکا متحده ایالاتو سره هم شریکې کړې دي.
د ترکیې ولسمشر، رجب طیب اردوغان وايي، ((اوس به موږ د فرات ختیځو سیمو ته ننوځو. موږ دا مالومات له روسیې او امریکا سره هم شریک کړي دي. دا نور موږ ته ناممکنه ده چې د پولې پر سر د عملیاتو لپاره تر ډیره غلي پاتې شو.))
اردغان دغه خبرې داسې مهال کوي چې په ایدلیب کې له اوربند وروسته د بیا رغونې او خوندي ځایونو جوړولو مسوولیت هم ور په غاړه دی.
د ایران، ترکیې او روسیې ترمنځ د تړون له مخې دغه هیوادونه اړ دي چې په ایدلیب کې څلور ستر خوندي ځایونه جوړ کړي.
په دغو خوندي ځایونو کې به هغه خلک اوسیږي چې د جګړې له سیمو تښتیدلي او اوس د اوسیدو ځای او سرپناه نه لري.
هغه کرد ځواکونه چې په شمالي برخو کې اوسیږي د امریکا له کلک ملاتړ برخمن دي او له داعش ډلې سره یې څو کلنه جګړه کړې خو ترکیه یې بیا د ځان لپاره ګواښ بولي.
