د امریکا د بهرنیو چارو وزارت یو ځل بیا ویلي، له افغانستان به د خپلو ځواکونو شمېر کم کړي.
د امریکا د بهرنیو چارو وزیر مایک پامپیو یو ځل بیا ټینګار کړی چې ټرمپ په افغانستان کې د امریکايي ځواکونو شمېر کموي.
پامپیو ویلي، ټرمپ په دې هڅه کې دی چې له ډیپلوماټیکو لارو له افغانستانه د خپلو ځواکونو او پوځي تجهیزاتو ایستلو ته زمینه برابره کړي.
د امریکا د بهرنیو چارو وزیر مایک پمپيو چې اسټرالیا ته تللی، په یوه خبري کنفرانس کې یې ویلي، ولسمشر ډونالډ ټرمپ غواړي ډاډه شي چې افغانستان یو ځل بیا امریکا ته پر یو ګواښ نه بدلېږي.
له دې سره د اسټرالیا دفاع وزیرې ویلي، افغانستان کې د جګړې ختمول پوځي حل نه لري او یوازې له سیاسي لارو د حل وړ ده.
د استرالیا د دفاع وزیرې لینډا رینولدس ویلي، د افغانستان د راتلونکي په تړاو د استرالیا دریځ د سولې د خبرو اترو پایله روښانه کوي.
له دې سره ویل کېږي، د امریکا او طالبانو د هوکړې له مخې به امریکا کې د ۲۰۲۰ ټاکنو پورې ټول بهرني ځواکونه افغانستان پرېږدي، امنیتي تړون به لغوه شي، طالب مشران به له تور لېسته وایستل شي او بندیان به یې ازاد شي.
د طالبانو د قطر سیاسي دفتر یو غړي مولوي شهاب الدین دلاور ويلي، د سولې هوکړه به د نړیوالو شاهدانو په حضور کې اعلانېږي، چې تر هغې وروسته به د ټاکل شوي مهالوېش سره سم په بشپړ ډول بهرني ځواکونه له افغانستان ووځي.
دلاور ويلي، امریکا سره د سولې هوکړې وروسته افغان سیاسي جهتونو سره بین الافغاني مذاکرات پیلوي، چې افغان حکومت به هم د یو سیاسي جهت په توګه دې خبرو کې ونډه اخلي.
مولوي شهاب الدین دلاور ویلي، اوربند، د اسلامي نظام قایمېدل او د اساسي قانون تعدیل د بین الافغاني مذاکراتو د اجنډا برخه ده.
د سولې خبرو لپاره د حکومت چمتووالی
له دې سره ویل کېږي چې د حکومت او سیاسیونو تر منځ د سولې پنځلس کسیز مذاکراتي پلاوي پر سر اختلافات رامنځته شوي دي.
ځینو سرچینو یو شمېر رسنیو ته ویلي، اختلافات ځکه رامنځته شوي، چې دیارلس تنه غړي یې حکومتي چارواکي دي.
سرچینو ویلي، د یاد هیئت ۱۲ تنه غړي د حکومت چارواکي دي، چې د حکومت او سیاسونو ترمنځ د اختلافاتو لامل شوی دی.
دا اختلافات په داسې حال کې دي چې د طالبانو او متحده ایالاتو ترمنځ په دوحه کې د سولې مذاکرات د بریالیتوب په درشل کې روان دي.
