پر روند سبز دفتر باندې وسله وال برید کې شل تنه وژل شوي او لسګونه نور ټپیان دي.
د امرالله صالح پر دفتر برید کې شل کسان وژل شوي او ۵۰ نور ټپيان دي.
کابل کې پر روند سبز دفتر وسله وال ډله ییز برید شپږ ساعته دوام وکړ.
برید د کابل ښار څلورمې حوزې اړوند سیمه کې د روند سبز دفتر باندې تیره ورځ شاوخوا څلور بجې په یوې چاودنې پيل شو او د شپې تر ۱۱ بجو یې دوام وکړ.
د کورنیو چارو وزارت ویاند نصرت رحیمي ویلي په برید کې شل کسان وژل شوي او پنځوس نور ټپيان دي.
رحیمي بیا وایي چې له دغه دفتره افغان ځانګړو ځواکونو ۱۵۰ اېسار پاتې کسان هم ژغورلي دي.
افغان ولسمشر دغه برید غندلی او ویلي یي دي چې د ده ورور امرالله صالح له یو پيچلي برید روغ وتلی دی.
له برید وروسته افغان ولسمشر محمد اشرف غني او اجراییه رییس عبدالله عبدالله د صالح پوښتنې ته ورغلي.
امرالله صالح په ټاکنیز ټیم کې له محمداشرف غني سره لومړی مرستیال دی.
د برید مسوولیت چا نه دی منلی
