کندهار کې پوځي مسوولین پر مرکزي حکومت نیوکه کوي چې د سرتېرو قربانۍ هېروي.
د جګړې د لومړۍ کرښې پوځي مسوولين د لوړپوړو دولتي چارواکو څخه ګېله لري چې د نظام د ساتلو لپاره د سرتېرو د قربانۍ قدر ورسره نه شته.
د ۲۰۵ اتل قول اردو قومندان ارکان حرب بېګ مراد وفايي وايي، د حکومت لوړپوړي چارواکي د خپلو شخصي او ګوندي ګټو په خاطر د نظام د زیانمولو او ړنګولو په هڅه کې دي.
د ۲۰۵ اتل قول اردو قوماندان ارکان حرب بېګ مراد وفايي داسې وايي (( هر وکیل دوه سوه او پنځوس زره افغانۍ د دولت معاش اخلي، له دېرشو تر څلوېښت زرو ډالرو باندې دولت قرار داد کړی چې زرهې موټر ورته واخلي، خو د تلویزیون پر صفحه راځي دولت او نظام تخریبوي. وزیر هم چې د دولت برحاله وزیر دی خپله نظام تخریبوي. همدا شان د ولسمشر مرستیال او د اجرایه ریاست معاونین هم دا دولت تخریبوي. خو زه وایم چې د وطن له هر څه تاسو خوند اخلئ خدمت دې څه دی ددې وطن او خاورې لپاره دې څه کړي دي؟))
نوموړي دغه څرګندونې په ۲۰۵ اتل قول اردو کې د ۱۰۲ کومانډويي سرتېرو د فراغت په موخه جوړو شويو مراسمو کې وکړې.
وفايي همدا ډول زیاته کړه چې نور به افغان کومانډويي سرتېري د پولیسو دنده نه؛ بلکې خپل اصلي مسوولیت ته ور وګرځي.
ارکان حرب بېګ مراد وفايي داسې وویل (( که خدای غوښتي وو او دلته وم، ددغې مافیا او زورواکو چې هره ورځ یې تېل بېرته ردوم او هغه قراردادیان چې هره ورځ ماته اخطارونه راکوي چې وزارت ته ځم او له دې ځای دې بدلوم پر وړاندې به یې همدا شان روان یم. وکیلان هم هره ورځ واسطه کوي چې له ارزګان مې بدل کړي کابل ته خو ما ورته مخکې هم ویلي او اوس یې هم ورته وایم چې ستاسو د ټولو دې لاس خلاص وي. زه به ټول کمانډویان له چک پاینټونو را اوباسم او خپلو اصلي مسوولیتونو ته به یې وګرځوم.))
دغو ۱۰۲ کومانډويي سرتېرو ته د چټک زغروال غبرګون په برخه کې د کوبرا په نوم د شپږو اوونیو په اوږدو کې روزنه ورکړل شوې ده.
دغه لوړپوړی پوځي چارواکی په داسي مهال پر جګپوړو دولتي مسوولينو د نظام د تخریب او فساد کې د ښکېلتیا تور پورې کوي چې ولسمشر غني د خپل واک په لومړیو کې د امنيتي او دفاعي ځواکونو د غیر سیاسي کېدو ژمنه او سپارښتنه کړې وه.
