مسوولین وايي، د سولې پروسه اوږده ده او ټاکنې به پر خپل وخت ترسره شي.
ولسمشرۍ ماڼۍ او ټاکنو کمېسیون وايي د سولې پروسه پر ټاکنو اغېز نه لري او کمېسیونونه به په خپل وخت ټاکنې ترسره کوي.
ټاکنو کمېسیون د شکایتونو له کمېسیون سره په ګډه خبري غونډه کې خبر ورکړ چې سوله اړتیا ده خو ټاکنې لومړیتوب دی او رڼې ټاکنې د سولې لپآره هم مهمې دي.
د ټاکنیزو شکایتونو کمېسیون بیا د ټاکنو له ښکېلو خواوو وغوښتل چې د ټاکنو د سلامت او کیفیت لپاره له ټاکنیزو کمېسیونونو سره همکاري وکړي.
دواړو ټاکنیزو کمېسیونونو ډاډ ورکړ چې د ټاکنو لپاره چمتوالی د پلان مطابق روان دی.
ټاکنو کمېسیون د سولې او ټاکنو د دوه مبهمو مفاهیمو په تړاو وویل چې ټاکنې به په خپل وخت ترسره شي او د سولې پروسه یې نشي اغېزمنولی.
دې ناسته کې دواړو کمېسیونونو ګډه اعلامیه ورکړه او د شفافو ټاکنو ژمنه یې وکړه.
د ټاکنیزو شکایتونو کمېسیون بیا د ټاکنو له ټولو ښکېلو خواوو وغوښتل چې د سالمو ټاکنو لپاره له ټاکنیزو کمېسیونونو سره همکاري وکړي.
ولسمشرۍ ماڼۍ د ټاکنو او سولې په تړاو شمشاد ته وویل چې د سولې پروسه اوږد وخت ته اړتیا لري نو ځکه د ټاکنو ترسره کول اړین دي.
له دې وړاندې د ټاکنو لپاره په ټاکنو د څار بنسټونو اندېښنې شریکې کړې وې چې چمتوالی ورته سم ندی روان او که وضعیت همداسې وي ټول منلې او سرتاسري ټاکنې نشي کېدلی، خو د ټاکنو کمېسیون همدې اندېښنو ته هم ځواب ووایه او ژمنه یې و کړه چې ټاکنې به پر خپل وخت او رڼې ترسره کړي.
