افغانستان ته راغلي بهرني ځواکونه وایي، هڅه کوي چې د ملکي وګړو د ژوند خوندیتوب ته پاملرنه وکړي.
په امنیتي شورا کې جنرال سکاټ میلر ویلي، افغانان باید پخپلو امنیتي ځواکونو وویاړي.
میلر ویلي، افغانان باید پوه شي چې پولیس او سرتیري د افغانانو ساتنه کوي او ځینې وختونه دوی ته په لوړه بیه هم تمامیږي.
هغه ویلي، په بشپړه توګه غواړي چې د ملکي خلکو د مرګ ژوبلې مخنیوی وکړي.
میلر ډاډ څرګند کړی چې په خپلو عملیاتو کې به دقت کوي او هغه کسان مسؤل ګڼي بې غوري کوي.
له دې سره سم، حکومت ژمن دی، چې د عملیاتو پر مهال عامو وګړو ته پاملرنه وکړي.
د ملي امنیت شورا سلاکار حمدالله محب، د یوناما له مشر تدامیچي یاماماتو سره په لېدنه کې دواړو لورو په افغانستان کې د ملکي وګړو د خوندیتوب پر اهمیت، امنیتي حالت او د سیمې پر وضعیت خبرې کړي.
محب ویلي، عملیاتو کې عامو وګړو ته د پاملرنې په موخه د امنیتي ارګانونو یوه ګډه کمېټه جوړه شوې، چې پر پوځي عملیاتو څارنه او د ملکي وګړو د خوندیتوب لپاره کار کوي.
هغه طالبان تورن کړي، چې له ملکي وګړو د سپر په توګه کار اخلي او په خپلو عملیاتو کې عام خلک په نښه کوي.
خو په دې وروستیو کې ډیره ملکي مرګژوبله بهرنیو ځواکونو اړولې ده.
