امکان شته چې تر راتلونکو دوه اوونیو به د سولې بین الافغاني خبرې پیل شي.
بهرنیو چارو وزارت وايي، له طالبانو سره سوله نږدې شوې او ممکن تر دوو اوونیو پورې د حکومت او طالبانو ترمنځ رسمي خبرې پیل شي.
د بهرنیو چارو وزارت ویاند صبغت احمدي وایي، ښايي په یوې یا دوه اوونیو کې بین الافغاني خبرې پیل شي او په وینا یې المان ضمانت کړی چې د افغان حکومت او طالب استازو ترمنځ به خبرو ته زمینه برابره کړي.
احمدي روښانه نه کړه چې دغه خبرې به کوم هېواد کې کېږي، خو وې ویل چې، اندونیزیا، ازبکستان او جرمني هغه هېوادونه دي چې د بین الافغاني خبرو د کوربتوب لپاره یې تیاری نیولی.
بل پلو قطر کې د طالبانو او امریکا متحده ایالاتو خبرې روانې دي چې ویل کېږي پرمختګ په کې شوی دی.
هلته د قطر په پلازمېنه دوحه کې د طالبانو او امریکایانو ترمنځ د غونډې ځینو برخوالو بي بي سي ته منلې چې که په روانو خبرو کې کومې هوکړې ته ورسېږي، نو کېدای شي چې بین الافغاني خبرې هم د جولای میاشتې په لومړیو کې پیل شي.
له دې سره طالبان او امریکایان د ترهګرۍ په تعریف سلا شوي دي.
اووم پړاو خبرو کې تمرکز د بهرنیو ځواکونو په وتلو او د افغانستان له اړخه امریکا ته په تضمین ورکولو دی، چې د ترهګرۍ تعریف یې یوه برخه ده.
طالبانو پخوا هم ویلي و چې، د افغان سولې قضيه کورنى او بهرنى اړخ لري چې د بهرني اړخ وروسته به له کورني اړخ سره خبرې پیل کړي.
