د بغلان ولایتي شورا وایي چې جمعه شپه طالبانو په نهرین ولسوالۍ کې د پاڅون کوونکو پر پوستو بریدونه کړي دي.
د ولایتي شورا یو غړي ویلي، په دغو بریدونو کې د پاڅون کوونکو قوماندان صلاح الدین په ګډون ۲۷ پاڅون کوونکي وژل شوي دي.
د بغلان سیمه ییز چارواکي یوازې برید تاییدوي خو په تړاو یې جزیات نه شریکوي.
طالبان وایي چې هلته یي ۲۸ پولیس وژلي ۱۲ یي ټپيان کړي او ۳ پوستې يي نیولي دي.
د بغلان ولایتي چارواکو په خبر نهرین ولسوالۍ ډېری د طالبانو او ځايي ملیشو په ولکه کې ده.
له دې سره د کندهار په تخته پل ولسوالۍ کې د پولیسو او وسله والو ترمنځ نښته کې ۱۶ سرحدي سرتیري وژل شوي.
دغه جګړه د جمعې په شپه د تخته پل ولسوالۍ په مېل سیمه کې شوې ده.
مېل سیمه د سپين بولدک ولسوالۍ لارې ته نږدې پرته ده.
دسرحدي ځواکونو يوې امنيتي سرچينې ویلي، جګړه د شپې ناوخته پیل او تر ډېره يې دوام وکړ.
د مالوماتو له مخې په دې برید کې ۱۶ سرحدي سرتیري وژل شوي او د هغوی یو هاموې ټانګ هم وسله والو له ځان سره بېلولی دی.
د سرچینې په وینا، په برید کې وسله والو ته هم درنه مرګ ژوبله اوښتې، خو کره شمېر يې یاد نه کړ.
طالبانو ادعا کړې، چي په دې برید کې د دوی یوازې یو ملګری وژل شوی، خو شل سرحدي سرتیري يې وژلي.
