ولسمشرۍ ته نوماند، محمد حنیف اتمر وايي، ولسمشر محمد اشرف غني مسؤل دی چې ولسمشریزې ټاکنې په خپل وخت ترسره کړي.
اتمر وايي، د جوزا له لومړۍ ورځې هاخوا د ولسمشر غني او عبدالله د کار دوام غیر قانوني او د هېواد په خیر نه دی.
ولسمشریزو ټاکنو ته نوماند محمد حنیف اتمر وایي، که ولسمشر غني اساسي قانون نقض کړي او حکومتي دستګاه د ځان لپاره وکاروي، هېواد به د سیاسي بې ثباتۍ په لور وغوځېږي.
اتمر وایي، که غني قانون ته غاړه کېنږدي، دوی به د قانون په چوکاټ کې پر بدیلو لارو چارو غور وکړي.
اتمر پر حکومت نیوکه وکړه چې سولې ته ژمن نه دی او په قطر کې بین الافغاني ناستې د لغوه کېدو لامل یې بولي.
دوی وړاندیز کوي چې باید سرپرست حکومت رامنځته شي.
اتمر له ټولو دولتي کارکوونکو غوښتنه وکړه چې د قانون په ماتولو کې د ولسمشر غني ملاتړ ونه کړي او خپل مسؤلیت وپېژني.
ارګ د اتمر د څرګندونو په غبرګون کې ویلي، په مخکېني حکومت کې د ټاکنو د ځنډ په اړه د افغانستان د جمهوررئیس د خبرو ویډیو د سترې محکمې د نظر له اعلان دمخه وه او وروسته له هغه چې سترې محکمې
د وخت د ټاکنو په اړه نظر اعلان کړ، جمهوررئیس غني د سترې محکمې پرېکړې ته درناوی وکړ.
ولسمشرۍ ماڼۍ همداراز د سرپرست حکومت د جوړولو په تړاو د اتمر غوښتنه د اساسي قانون خلاف وبلله.
د ولسمشر ویاند هارون چخانسوري پر ټوېټر لیکلي، د ګرانو هیوادوالو د خبرتیا لپاره یادونه کېږي چې د اساسي قانون د تفسیر یوازینۍ مرجع د افغانستان د اسلامي جمهوریت ستره محکمه ده او هر ډول ترتیباب په
اصطلاح “موقت او یا سرپرست حکومت” د اساسي قانون او نظام خلاف دي.
