یوناما یا افغانستان کې د ملګرو ملتونو سیاسي دفتر وايي، د ۲۰۱۹ م کال لومړۍ درېیو میاشتو کې ټول ټال ۱۷۷۳ تنه ملکي وګړو ته مرګ ژوبله اوښتې چې ۵۸۱ په کې وژل شوي او ۱۱۹۲ نور ټپیان شوي، چې د تېر کال د همدې مودې پرتله د ملکي تلفاتو ۲۳ سلنه کمووالی ښکاره کوي
ملګري ملتونه وايي، ښايي د ملکي تلفاتو دا کمېدل په ژمي کې د ډېرو بریدونو نه کېدو له کبله شوي وي.
یوناما وايي، د تېر ۲۰۱۸ کال همدې مودې پرتله چې ۷۵۱ ولسي وګړو ته په ۱۹ پېښو کې مرګ ژوبله اوښتې وه، سږ کال په لومړۍ ربع کې دا مرګ ژوبله ۱۷۸ کسه وه.
په دې تازه رپوټ کې ویل شوي، د حکومت پلوو ځواکونو له خوا په هوايي بریدونو کې ۴۱ سلنه او په چاڼیزو عملیاتو کې ۸۵ فیصده ډېروالی راغلی دی، چې ملګري ملتونه یې اندېښمنه کړې ده.
د ملګرو ملتونو راپور له مخې، هوايي بریدونه د ولسي مړینې لوی لامل او ورپسې هدفي وژنې او د جګړې د پاتې شویو توکو چاودل د ولسي تلفاتو ستر عوامل ګڼل کېږي.
د ملګرو ملتونو سرمنشي تدامیچي یماماتو د افغانستان د جګړې پر ښکېلو غاړو غږ کړی چې جګړې پرمهال د ولسي وګړو ژوند ته پام وکړي.
یوناما وايي، د ۲۰۱۹ کال لومړیو درېیو میاشتو کې دولت ضد ډلې د ډېری ملکي تلفاتو مسؤول پاتې شوي، چې په بریدونو کې یې ټول ټال ۹۶۳ ولسي وګړو ته مرګ ژوبله (۲۲۷ وژل شوي او ۷۳۶ ټپیان) اوښتې، چې دا د تېر کال د همدې مودې پرتله ۳۶ سلنه کموالی ښيي.
یوناما طالبانو ته ۳۹ سلنه، “اسلامي دولت” (داعش) نومې ډلې خراسان څانګې ته ۱۲ سلنه او نا پېژاندو دولت ضد عناصرو ته درې سلنه ملکي تلفات منسوب کړي دي.
