د کندز امنیه قوماندان، ناقانونه وسلهوالو ته خبردرای ورکړی چې جرړې به یې وباسي.
د کندز امنیه قومندان منظور ستانکزی وایي ناقانونه وسله وال هم حکومت او هم ملت ته ګواښ دی او په دغه ولایت کی به یې جرړې وباسي.
ستانکزی چېي د خان آباد ولسوالۍ ته په سفر تللی و خلکو ته یې ډاډ ورکړ چې په دغه ولسوالۍ کې به یې د ناقانونه وسله والو ختمول لومړیتوب وي.
که څه په خان آباد ولسوالۍ کې د ناقانونه وسله والو پخوانی زور اوبه شوی خو لا هم خلک ویره لري چې کله ناکله د خلکو د زورونې سبب ګرځي .
د کندز ځینو ولسوالیو ته امنیه قومندان منظور ستانکزي په دې موخه سفر وکړ، چې د سرتیرو امکانات له نږدې وګوري او ستونزې یې واوري.
په چهاردره کې چې ډیری وخت ترې د جګړې راپورونه ورکول کېږي مېشتو سرتېرو امنیه قوماندان ته د امنیت ډاډ ورکړ.
په کندز ولایت کې د حکومت د مخالفینو سربېره نامسووله وسله وال هغه څوک دي چې ډېری وخت ملت او حکومت ته سرخوږی جوړوي.
د کندز امنیه قوماندان منظور ستانکزی چی خان آباد ولسوالۍ ته تللی و، خلکو ورته د ناقانونه وسله والو له اړخه شکایتونه درلودل.
ستانکزی هم مني چې ناقانونه وسله والې ډلې د حکومت تر مخالفینو هم لوی ګواښ دی او خبرداری ورکوي چې لومړی به نامسووله وسله وال هدف وګرځوي.
د ستانکزي وروستیو څرګندونو او ژمنو د خان آباد خلک هیله مند کړي دي.
د سیمې مشران وايي، که څه هم په اوس کې د ناقانونه وسله والو زور اوبه شوی خو لا د خلکو د امنیت پر وړاندې جدي ستونزه ده.
امنیه قوماندان په داسې حال کې د کندز له مرکز څخه لرې پرتو ولسوالیو ته سفرونه کوي چې څو ورځې وړاندې د ولسوالیو د ودانیو سربېره د کندز مرکز د سقوط اندېښنې زیاتې شوې وې خو امنیه قوماندان ډاډ ورکوي، چې هیڅوک دې د کندز د سقوط په اړه اندېښنه نه کوي.
