د عبیدالله بارکزي جنازه د ملي شورا په انګړ کې خاورو ته وسپارل شوه .
د ملي شورا غړو د عبیدالله بارکزي ترور د افغان ولس د دښمنانو کار وباله او دا یې نه جبرانیدونکې ضایع یاده کړه .
د بارکزي زامن د خپل پلار د ترور د عاملینو د نیولو او مجازات غوښتنه کوي .
ولسمشر د بارکزي کورنۍ ته ډاډ ورکړی چې د دې پېښې په تړاو به پلټنې کوي.
د جنازې او تدفین مراسمو کې ولسمشر غني د عبیدالله بارکزي جسد ته درناوی وکړ او هغه یې د هغو قهرمانانو له ډلې یاد کړ چې د دې خاورې نور اولادونه ورڅخه جوړ دي.
ولسمشر ډاډ وښود چې د دې پېښې په تړاو به پلټنې کوي.
د ملي شورا انګړ ورته انتخاب شوی چې یو شمېر نور غړي پکې هم خاوره سپارل شوي.
د ملي شورا غړي وايي عبیدالله بارکزي پر ملي ګټو ولاړ دریځ درلود او تل یې له اسلامي او ملي ارزښتونو دفاع کړې .
د لوی کندهار ځینې استازي بیا وايي چې د بارکزي د ترور عاملین ورته مالوم دي خو دا چې یې پر حکومت د هغوی د نیولو باور نشته په ګوته کولای یې نشي .
د عبیدالله بارکزي کورنۍ او حزب اسلامي چې بارکزي ورسره سیاسي تړاو درلود له حکومت غواړي چې د ترور عاملین یې د قانون منګلو ته وسپاري .
عبیدالله بارکزی د ولسي جرګې د شپاړسمې تقنیني دورې غړی و او د جرګې د شکایتونو کمېسیون رییس و چې د شنبې په ورځ کندهار کې نامالومو وسله والو په ډزو وواژه.
