حکمتیار وايي، کابل ته په راتګ پېښمانه نه دی خو طالبانو د ناسمو ټاکنو له امله پیغور ورکړی دی.
د حزب امیر وايي، د ولسي جرګې ټاکنې له درغلیو ډکې وې او پایلې یې هیڅ میړنې افغان ته د منلو وړ نه دي.
ښاغلی حکمتیار وايي، د ولسمشریزو ټاکنو د نوماند لپاره د ټاکل کېدو لپاره د جمعیت په ګډون د حزابو مجموعه جوړه شوې چې دوی د ځانګړو شرایطو په وړاندې کول سره د ملاتړ هوډ لري.
د حزب اسلامي امیر د سولې په برخه کې د دولت هڅې او پارلماني ټاګنې یو ځل بیا وننګولې.
ښاغلي حکمتیار تر ډېره په روانو پروسو توندې نیوکې وکړې او په ځینو مسایلو کې یې د خپلې ادعا د زباد لپاره اسناد هم وړاندې کړل.
د حزب اسلامي امیر وویل، طالبانو د درغلیو ډکو ټاکنو له امله پیغور ورکړی، خو حکمتیار سره له دې چې هر څه د خپلې تمې خلاف ګڼي بیا هم په خپل راتګ پېښمانه نه ښکاري.
حکمتیار وايي، د کمېسیونونو دلالان دا مهال په دې بوخت دي چې د پسو په بدل کې بریالي نوماندان ناکام او ناکام هغه بریالي اعلان کړي.
ښاغلي حکمتیار د سولې په تړاو د ولسمشر له لورې په اعلان شوي بورډ هم نیوکې وکړې او زیاته یې کړه چې دا بورد د اجراییوي صلاحیت پر ځای مشورتي دی.
ولسمشریزې ټاکنې هم د حزب د امیر د تمرکز وړ موضوع وه، خو ټینګار یې دا وه چې د حزب له ادرسه به نوماندان نه وي بلکې د احزابو او مطرح څېرو جوړه شوې مجموعه په دې برخه کې پریکړه کوي، هغې له طالبانو هم په دې مجموعه کې د ګډون غوښتنه وکړه.
ښاغلی حکمتیار وايي، ولسمشر غني هم اوونۍ وړاندې ترې د ملاتړ غوښتنه کړې خو د جمعیت حزب په ګډون جوړه شوې مجموعې ورته شرایط وړاندې کړي، که منلو ته زړه ښه کړي نو د دوی ملاتړ ورڅخه شونی دی.
