نیول شوي تاریخي اثار اطلاعاتو او کلتور وزارت ته وسپارل شول.
د حامد کرزي د نړيوال هوايي ډګر ګمرک کې له ۱۳۹۴ کال راهيسې بېلابېل نیول شوي تاريخي اثار، چې لرغونتيا يې آن تر بودايي دورې رسېږي نيول شوي او اطلاعاتو او کلتور وزارت ته وسپارل شول.
په دغو نيول شويو تاريخي اثارو کې ۲۴۱ فلزي، مسي سکې، ۲ چيني کاسې، ۲ کوزې، ۱ چاينکه ، ۵۸ په لاس ليکل شوي کتابونه ، ۱۱ پاڼې خطي اثار ، ۱ ليکل شوې پاڼه او د بودايي دورې د یوې مجسمې سر شامل دي.
د کابل ګمرک مرستیال عبدالله رقيبي وايي دغه اثار د کلتوري ارزښت تر څنګ د افغانستان په اقتصاد هم ښه اغېزه لرلی شي.
عبدالله رقيبي وايي نيول شوي اثار د کلتوري ارزښت ترڅنګ اقتصادي ارزښت هم لري او په ملي موزيم کې له ځای پرځای کېدو وروسته کولی شي د سياحانو پام ځانته را واړوي او داچاره د هېواد په اقتصاد مثبته اغېزه کولی شي.
په ورته مهال کې د اطلاعاتو او کلتور وزارت مرستيال رسول باروي هم وايي په داسې موقف کې قرار لري، چې خپل لرغوني اثار خوندي کولی شي.
باوري وايي د افغانستان د اثارو په بیا موندنه کې داخلي او بهرني همکاران لري ، چې دوی سره يې په دې برخه کې مرسته کړې.
اطلاعاتو او کلتور وزارت ته د دې اثارو د تسليمۍ په غونډه کې ګمرکي چارواکو د دغو اثارو د پېژندلو او بهر ته يې د قاچاق د مخنيوي په برخه کې له دغه وزارت د کارکوونکو د روزنې په برخه کې د ورکشاپونو غوښتنه وکړه.
خبریال محبوب الهی
