خلیلزاد: تمه لرو تر ولسمشریزو ټاکنو وړاندې سوله وشي.
د افغانستان د سولې بهیر لپاره د امریکا ځانګړی استازی زلمی خلیلزاد تمه لري چې د ولسمشریزو ټاکنو څخه مخکې به له طالبانو سره سوله وشي.
د افغان سولې په تړاو د امریکا د بهرنیو چارو وزارت ځانګړي استازي زلمي خلیلزاد
کابل کې له یو شمېر رسنیو سره په خبرو کې ویلي، هڅه کوي چې تر هرڅه ژر د سولې برخه کې پرمختګ ته ورسېږي.
خلیلزاد چې د راپورنو له مخې په قطر او عربي هېوادونو کې يې له طالب استازو او ځيني نورو ښکېلو غاړو سره مهمې خبرې کړي هیله مند دی چې تر راتلونکو شپږو میاشتو افغانان په خپل منځ کې روغې جوړې ته ورسېږي.
خلیلزاد ویلي، د افغان سولې لار او نقشه دا ده چې داسې افغانستان وي چېرته چې هر افغان خپل حقوق ولري او له دې هېواد څخه نړیوالې ټولنې ته هېڅ ګواښ نه وي متوجې.
اسوشیټډ پرس اژانس د ځينو سرچینو په حواله لیکلي، چې په قطر کې خلیلزاد له طالب استازو سره په ناسته کې د ولسمشریزو ټاکنو پر ځنډ، د موقتي حکومت په جوړښت، د طالب زندانیانو په ازادېدو، اوربند او د سولې د خبرو په څرنګوالي هم خبرې کړي دي.
د طالبانو دریځ
طالبانو هغه رپوټونه رد کړې چې ګنې له امریکا سره یي په افغانستان کې په لنډ مهاله دولت او ټاکنو ځنډولو خبرې کړي دي.
د طالبانو له ادرسه په خپره شوې خبرپاڼه کې راغلي چې دوی د امریکا له پلاوي سره خبرې کړي خو کومې پایلې ته نه دي رسېدلي.
په خبرپاڼه کې راغلي چې د طالبانو د سولې مرکچي پلاوی به هر ډول مالومات له ولس سره شریکوي .
