د طالبانو دوه نور لوړپوړي چارواکي د پاکستان له زندان ازاد شول.
د ملا عبدالغني برادر له خلاصون وروسته پاکستان دوه نور طالبان هم له زندان ازاد کړي دي.
د ځینو نا تایید شویو راپورونو په اساس ، زلمي خلیلزاد پاکستان ته د ځینو هغو طالب مشرانو نوملړ ورسپارلی چې پاکستان کې له کلونو راهیسې بندیان و.
د پاکستان له زندان تازه ازاد شوي طالبان ملا عبدالصمد ثاني او صلاح الدین نومیږي.
عبدالصمد ثاني د طالبانو د تحریک په مهال د افغانستان بانګ مشر او وروسته بیا د طالبانو د مالي مرستو راټولونکی شو.
سولې عالي شورا د دغو طالبانو له خلاصون څخه بې خبره خو طالبانو ته نیږدې کسان د دغو څېرو ازادیدل مني.
صلاح الدین نومی بیا د هغو طالب قومندانانو له ډلې و چې په جګړه کې مشهور و او د طالبانو له سقوط وروسته یې هم څو کاله جګړه کړې وه.
پاکستان د ملا عبدالغني برادر خلاصون د زلمي خلیلزاد په غوښتنه کړی خو طالبانو بیا ویلي وو چې غني برادر له قید او شرط پرته پاکستان ازاد کړی.
سولې عالي شورا د تازه خوشې شویو بندیانو په اړه څه نه وايي، خو زیاتوي چې پاکستان تر اوسه د سولې په برخه کې ریښتنې ګامونه نه دي اخیستي.
اوس چې زلمی خلیلزاد د دویم ځل لپاره د افغان سولې د ټینګښت لپاره راغلی تر دې دمه یې ولسمشر غني، اجراییه رییس، او ځینو نورو سیاسیونو سره یې لیدلي او تمه ده چې روسیې او ځینو نورو هېوادونو ته هم سفر وکړي.
