پر ایران د سختو بندیزونو سره سم؛ افغانستان له امریکا سره پر چابهار بندر خبرې پيل کړي
افغان حکومت له امریکا سره د چابهار بندر په تړاو خبرې کړي چې تمه کېږي ښې پایلې به ولري.
تیره ورځ ولسمشر محمد اشرف غني د مرکزي او سویلي اسيا په چارو کې د امريکا د بهرنيو چارو وزارت مرستيالې اليس ویلز سره پر چابهار بندر د امریکا د بندیزونو د اغېزو پر څرنګوالي خبرې کړي دي.
له ارګ څخه په خپره شوې خبر پاڼه کې ویل شوي چې افغان حکومت مخکې هم د چابهار بندر په اړه د امریکا متحدو ایالتونو حکومت سره خبرې کړې وې، چې د دې بحثونو او د امريکا د بهرنيو چارو وزارت مرستيالې سره د ولسمشر د تیرې ورځې د پحث پایلې به ژر له خلکو سره شریکې شي او د افغانستان لپاره به ښې اقتصادي پایلې ولري.
د افغان حکومت او امریکا دغه خبرې داسې مهال پیل شوي چې پر ایران د دوشنبې په ورځ د امریکا نوي خو تر ټولو سخت بندیزونه لګېږي.
د امریکا ولسمشر پر ایران ټول هغه بندیزونه لګوي چې د ۲۰۱۵ کال اټومي تړون وروسته ترې لرې شوي و.
په دې بندیزونو کې د تېلو صادرات، بېړیو تګ راتګ، بانکونه او د هېواد د اقتصاد ټولې مهمې برخې راځي.
