طالبان: له جزیاتو پرته؛ مسکو ناسته کې ګډون نه کوو
طالبان وايي، تر څو چې د روسیې ناستې اجنډا تر لاسه نه کړي ګډون پکې نه کوي.
د طالبانو له لیکو باخبره کسان وايي، که د حکومت پلاوي ته په دې ناسته کې د افغانستان له ادرسه مشري ورکړي طالبان به زړه ښه نه کړي چې په ناسته کې ګډون وکړي.
سولې عالي شورا اعلان کړی چې د افغانستان له ادرسه به شپږ کسیز پلاوی د روسیې ناستې ته واستوي.
داسې ښکاري چې د روسیې ځنډلې ناسته په نیږدې راتلونکې کې جوړیږي خو لاهم د غونډې ځینو احتمالي ګډونوالو د ګډون وروستۍ پریکړه نه ده کړې.
شمشاد ټلویزون ته رارسیدلي مالومات ښيي چې د روسیې له ادرسه یو شمېر بلل شوي افغان سیاسیونو په غونډه کې د ګډون لپاره د روسیې ویزې تر لاسه کړي دي.
په دې غونډه کې حامد کرزی، عطا محمد نور، عمر داوود زی، اسماعیل خان او ځینې نورې مطرح څېرې بلل شوي چې د مالوماتو په اساس په تېرو څو ورځو کې د دغو کسانو له ډلې ځینې یې په روسیې سفارت کې لیدل شوي خو سیاسیونونو رسمي تر اوسه په اړه څه نه دي ویلي.
په غونډه کې د سولې عالي شورا د ګډون له اعلان وروسته طالبانو بیا تر اوسه پریکړه نه ده کړې .
ذبیح الله مجاهد وايي، د اسلامي امارت مشران په خبرو بوخت دي او د اجنډا له تر لاسه کولو سره سم به د ګډون پریکړه وکړي.
سولې عالي شورا تېره ورځ اعلان وکړ چې د افغانستان له ادرسه شپږ کسیز پلاوی ګډون کوي د ګډون شرایط او د اشخاصو نومونه یې تر اوسه نه دي روښانه کړي.
د ولسي جرګې ځینې غړي وايي، افغان حکومت ته په کار ده چې د خپل نیږدې او پياوړي ملګري امریکا په رضایت سره په دې ناسته کې ګډون وکړي.
د روسیې په ناسته کې د افغان حکومت، طالبانو او افغان سیاسیونو سربېره لسو نورو هېوادونو ته بلنه ورکړې شوې خو امریکا بیا وار له مخې په دې ناسته کې د روسیې بلنه رد کړې ده.
