کندهار کې ولسي جرګې ته د نوماندانو ناظرينو د کندهار د ټاکنو کمېسیون د تړلو ګواښ وکړ.
د نوماندانو لسګونو ناظرينو د کندهار د ټاکنو د خپلواک کمېسیون مخته د اعتراض په ډول راټول شوي وو او ټاکنيزو کمېسيونونو له مسوولينو څخه يې وغوښتل، چې کندهار کې د ټاکنو په اړه ثبت شوي شکایتونه په بې پرې ډول وځېړېاو له بايمټريک پرته نورې رایې باطلې اعلان کړي.
ناظرين د شکایتونو له کمېسيون څخه غواړي، چې ثبت شوي ټاکنيز شکایتونه وڅيړي او د بايومټريک پرته نورې رایې ونه شمېري.
معترضین تور لګوي، چې د ټاکنو کمېسیون په خپلسري او ناقانونه توګه په خپل سر د رايې صندقونه خلاص کړي او درغليو ته زمینه برابروي.
پر همدې مهال د کندهار د ټاکنيزو کمېسيونونو مسوولين وایي، چې د اعتراض کوونکو غوښتنو ته به رسېدنه کوي.
پر همدې مهال د کندهار د ټاکنیزو شکایتونو د کميسيون مسوولين وایي، چې کندهار کې د تيرې شنبې د ورځې د ټاکنو په اړه ورسره ۴۵۰ رسمي شکایتونه ثبت شوي دي، چې تر ۱۴۰ پورې يې جدي دي.
بل لوري بيا د کندهار د ټاکنو کميسون مشر نعمت الله وردګ وايي، چې د رایې صندقونه يې د شکایتونو د کمیسیون، ټي پا، فیفا او د ناظرينو مخ ته مات کړي او خاص ليستونه یې ځيني را ايستلي دي.
د کانديدانو په ګټه په يو شمېر ولسوالیو کې د صندقونو ډګېدل، د زور کارونه، د ټاکنو په ورځ د ټاکنو د کمېسيون د کارکوونکو لخوا د یو ځانګړي کانديد په ګټه د رایې ورکونکو هڅول او داسې نور هغه موارد دي، چې د ټاکنو د ورځې راهيسې کندهار کې د ټاکنيزو شکایتونو په توګه ثبت شوي دي.
