غوڅ ملاتړ ماموریت وايي، د افغانستان جګړه پوځي حل لار نلري.
سکاټ مېلر ویلي، هغه وخت را رسېدلی چې د افغانستان د ستونزې هواري لپاره په سیاسي حل لارې تمرکز وشي.
شنونکي وايي، د ناټو تازه څرګندونې د دې ښکارندوي کوي چې د امریکا او ناټو په دریځ کې بدلون راغلی او تازه وړاندې شوې لار د ټولو اړخونو په ګټه ګڼي.
امریکا بالاخره اعتراف وکړ چې د افغانستان ستونزه له پوځي اړخه د حل وړ نه ده.
په افغانستان کې د امریکايي ځواکونو او غوځ ملاتړ ماموریت قوماندان سکاټ مېلر تازه ویلي چې د افغانستان ستونزه پوځي نه بلکې سیاسي حل لار غواړي او طالبان هم جګړه د جګړې له لارې نشي ګټلی.
جنرال مېلر داسې ویلي (( دا جګړه به هغوی له پوځي پلوه و نه ګټي. موږ ددې جګړې سیاسي حل لار غواړو. زما په آند طالبان هم اوس پوه شوي چې ددې جګړې له پوځي پلوه ګټل ورته ګران دي. نو که طالبان هم پوهیږي بیا د خلکو د پوښتنې لاندې راځي چې بې فایدې جګړه ولې کوي. غوره به دا وي چې هغوی هم د سولې د خبرو لپاره هڅه وکړي.))
امریکا دغه څرګندونې له طالبانو سره د سولې په تړاو د مخامخ خبرو وروسته کوي چې د ځینو په باور په دې وروستیو کې د امریکا په دریځ کې بدلون لیدل کیږي.
د دې تر څنګ سکاټ مېلر د افغان ځواکونو د لوړې مرګ ژوبلې د را کمېدو لپاره ویلي چې په طالبانو به هوايي بریدونه زیات کړي.
سکاټ مېلر له بهرني ټلویزیون سره مرکه کې د کندهار پېښې ته هم اشاره کړې چې هلته دی هدف نه و، خو افغانستان کې ټول له خطر سره مخ دي.
میلر ویلي، داعش په روان کال کې یوازې کابل کې نولس خونړۍ حملې کړي او دا بهرنۍ ريښې د پراختیا په حال کې دي.
امریکايي قومندان انديښنه ښودلې که افغانستان امن نه وي، نو د داعش او القاعده په څېر وسلهوالې ډلې به پر امریکا او متحدینو بریدونو ته دوام ورکړي.
