د ولسي جرګې ځینو غړو ادعا وکړه، چې طالبانو د پاکستان په فرمایش د سولې لپاره د ځینو جنرالانو وژل او له دندو لرې کول د شرط په توګه وړاندې کړي .
د ولسي جرګې ځینې غړي وايي، جنرال عبدالرازق د سیاسي لوبې قرباني دی او حکومت ته پکار ده د پېښې ګونګ اړخونه له خلکو سره شریک کړي.
وکیلانو د ټاکنیزو کمېسیونونو ترمنځ ځینو مواردو کې اختلافو باندې انديښنې دي چې د ولسي جرګې د ټاکنو پایلې به اغیزمنې کړي.
د ولسي جرګې په ازاد بحث کې وکیلانو شک وښود چې جنرال رازق د سولې لپاره د یوې سیاسي لوبې قرباني شوی دی .
د جرګې غړي عبدالرحیم ایوبي او الله ګل مجاهد وویل پاکستان طالبانو ته هغه افغان جنرالان په ګوته کړي، چې د پاکستان ضد دي او طالبان اوس د ځینې جنرالانو وژل او له دندو لیرې کول د شرط په توګه وړاندي کړي دي.
په ورته وخت کې د ټاکنو د خپلواک او ټاکنیزو شکایتونو کمیسیونونو ترمنځ د تورو او سپینو رایو د جلا کولو پر سر پیدا شوی اختلاف او تقابل لا پسې خلک د ټاکنو په پروسې بې باوره کړي.
ځینو وکیلانو ویل چې کمیسیونونو درغلیو ته مټې بډ وهلي او راتلونکې ولسي جرګې ته به اتیا سلنه درغلګر بریالي شي چې د خلکو استازیتوب به نه شي کولای.
ولسي جرګې د کندهار امنیتي چارواکو او د عبدالجبار قهرمان د وژلو په تړاو ملي دفاع او کورنیو چارو وزیران او د ملي امینت لوی رییس هم ورغوښتی و خو دغه چارواکي جرګې ته حاضر نه شول .
