د مشورتي لویې جرګې سیاسي مخالفینو په جرګه کې ګډون ونه کړ.
استاد سیاف چې د مشورتي لویې جرګې ریاست ور تر غاړې دی، له ټولو مخالفو سیاسي څیرو یې هیله وکړه چې د جرګې په وروستۍ ورځ کې ورشي.
خو ولسمشر بیا د دوی د نه ګډون په تړاو قضاوت ولس ته پرېښود.
د عبدالله عبدالله او حامد کرزي سربیره د ولسمشرۍ ټولو نوماندانو د سولې مشورتي لویه جرګه د وخت ضایع او ټاکنیز کمپاین یاد کړی.
د سولې مشورتي لویه جرګه کې د هیواد د څلور دیرشو ولایتونو درې زره دوه سوه استازو ګډون کړی خو اجرایه رییس عبدالله عبدالله د حزب اسلامي رهبر ګلبدین حکمتیار ، مخکیني ولسمشرحامد کرزي سربیره د ولسمشرۍ ټولو نوماندانو دغه غونډه تحریم کړې .
د سولې مشورتي لویې جرګې نه د دوی تعریف دا دی چې ګواکې دغه جرګه د سولې په نوم د وخت ضایع او د ولسمشر لپاره کمپاین دی .
حامد کرزي داسې ویلي (( د دودیزو او مشورتي جرګو له لارې ملي اجماع ته د رسیدو په موخه مې تل د یو افغان په توګه ټینګار کړی خو په اوسنیو شرایطو کې د سولې مشورتي لویه جرګه نه د خلکو په ګټه ده او نه هم ملي اجماع ته د رسېدو لار ده.))
محمد حنیف اتمر داسې ویلي (( د سولې او اعتدال ټاکنیز ټیم د سولې مشورتي لویې جرګې په تړاو په خپل پخواني دریځ ټینګار کوي او دغه جرګه د سولې په پروسه کې د حکومت لخوا د وخت له ضایعه کولو او له غیر قانوني ټاکنیز کمپاین پرته بل څه نه ګڼي او له دې امله زموږ د ټیم غړي به په دغه سفارشي لویه جرګه کې ګډون ونه کړي.))
ولسمشر محمد اشرف غني جرګې ته وینا کې بیا وویل جګړه سیاسیون نه بلکې ولس زیانمنه وي او هغوی چې په جرګه کې ګډون نه دی کړی ولس باید پرې قضاوت وکړي .
استاد سیاف چې د سولې مشورتي لویې جرګې د رییس په توګه وټاکل شو بیا وايي هغوی چې په جرګې کې ګډون نه دی کړی د سولې مخالف نه دي او باید په وروستۍ ورځ په جرګه کې ګډون وکړي .
د سولې مشورتي لویه جرګه به څلور ورځې دوام وکړي او په دغه موده کې به یې غړي د کاري کمیټو له لارې له طالبانو سره دسولې خبرو لپاره ځانګړې تګاره وټاکي .
