د محمد محقق په اړه د ولسمشر حکم د اجرایه ریاست له غبرګون سره مخ دی.
دا جنجال وروسته له هغې پيدا شو چې ولسمشر په یو حکم سره د اجرایه ریاست دویم مرستیال محمد محقق له دندې لیرې کړ.
خو اجرایه ریاست وایي، د ولسمشر دا حکم د ملي یووالي حکومت د هوکړې خلاف دی او بې ثباتي رامنځ ته کولای شي.
د ټاکنو لپاره د نوماند کیدو او یا د یو نوماند مرستیال کیدو وړاندې باید دولتي دنده پریښودل شي، خو د اجرایه ریاست دویم مرستیال محمد محقق چې د سولې او اعتدال ټاکنیز ټکټ کې د دویم مرستیال په توګه منل شوی، له دندې یې استعفا نه وه کړې چې ولسمشر په حکم کې هغه له دندې ګوښه کړی دی.
(( د اساسي قانون د ۶۴مې مادې د ۱۳مې فقرې د حکم په اساس د ملي یووالي حکومت اجرایه ریاست د دویم مرستیال محمد محقق عزل منظور دی.))
د ولسمشر دا حکم د اجرایه ریاست له غبرګون سره مخ دی او انديښنه یې ښودلې چې دا به بې ثباتي رامنځ ته کړي.
اجرایه ریاست وايي، د ملي یووالي حکومت چې اجرایه ریاست یې په تشکیل کې دی له ټاکنو وروسته د یو بل حکومت پورې به کار ته دوام ورکوي.
د اجرایه ریاست په تړاو اساسي قانون کې داسې کومه ماده نشته چې رهبري او یا مرستیالان به یې استعفا ورکوي که نه، خو ولسمشر ته اساسي قانون کې ځینو واکونه شته چې دا پریکړه یې کړې ده.
