د ازبکستان پلازمېنه تاشکند کې دا په ډاګه شوه،چې سیمه په افغانستان کې د ترهګرو ډلو په تړاو اندیښنه لري،خو تراوسه پورې یې په دغه برخه کې هېڅ ډول اقدام نه دی کړی او نه کوم هېواد په ښکاره له افغانستان سره پر ګډه د ترهګرۍ ضد مبارزه پيل کړې ده.
د سیاسي چارو یو شمېر کارپوهان وايي،د سیمې ځینې هېوادونه ترهګرې ډلې لري او د دې پرځای چې دغه هېوادونه د ترهګرۍ په تړاو اندیښنې وښي،باید له افغان حکومت سره لاس په لاس له نږدې کاروکړي اود افغانستان نظام په رسمیت وپیژني.
دوی وايي،اوس او له دې وړاندې چې کومې وران کارې ډلې په افغانستان کې نیول شوي، اکثریت یې د سیمې هېوادونو اتباع دي نه د افغانستان.
د مشرانو جرګې پخوانی غړی هاشم الکوزی وايي:«افغانستان ته تروریزم سیمې او همسایه هېوادونو راستولی او رااستوي یې. زه پر دغو هېوادونو غږ کوم،چې تاسو خپل تروریزم بند کړئ،افغان ولس هیڅ کله هم تروریزم ته اجازه نه ورکوي او د سیمې هېوادونه لومړی باید د افغانستان اسلامي نظام پر رسمیت وپیژني،بیا دې ترې ګیلې او خپلې اندیښنې کوي. لومړی د افغانستان نظام پر رسمیت وپیژنه،بیا ترې د هغوترهګرو ډلو له منځه تلو تمه وګړه،چې تاسو یې رااستوئ.»
د سیاسي چارو کارپوه حکمت الله حکمت وايي، د دې پر ځای چې د سیمې هېوادونه پر افغان لوري تورونه پورې کړي،باید له ترهګرۍ ګډې مبارزې لپاره میکانیزم وړاندې او باید عملي ګامونه پورته کړي.
حکمت زیاته کړه:« د دې پرځای چې د سیمې هېوادونه تورونه پورې کړي او افغان لوری په ترهګرۍ متهم وګرځوي،ښه داده،چې له ترهګرۍ سره د مبارزې د سالم میکانیزم وړاندیز وکړي،چې افغانان د ترهګرۍ د مبارزې مشري پر غاړه واخلي. پرته له دې چې کوم اسناد او شواهد وړاندې کړي او په دغه برخه کې افغان لوري سره همکاري ولري، زموږ ګاونډیان او سیمه ییز لوبغاړي تورونه پورې کوي او دا کار یې هم د فشار واردولو لپاره دی.»
د سیاسي چارو کارپوه هاتف مختار بیا په دې باور دی، چې افغانستان د ثبات پر لور روان دی او حکومت یې نه غواړي،چې په افغانستان کې دې داسې وران کارې ډلې فعالې وي،چې د نورو د ملي حاکمت او ګټو ته دې ګواښ وي.
مختار وايي، غوښتنه یې دا ده،چې سیمه او په ځانګړې توګه د افغانستان دوه ګاونډي، تاجکستان او پاکستان دې نور په افغانستان کې د نیابتي جګړې لپاره له هڅو لاس واخلي او په لوی لاس دې افغانستان او سیمې نه ناامنه کوي.
هغه زیاته کړه:« د سیمې هېوادونه او ګانډیان باید پوه شي،چې اوس افغانستان سولې لور ته روان دی،افغانستان نه غواړي،چې هیڅ کومه ترهګره ډله فعاله وي او د چا ملي منافعو ته ګواښ واقع شي. غوره داده،چې سیمه او په ځانګړي توګه پاکستان او تاجکستان هغو ترهګرو ډلو ته لابي ونه کړي او بلې نیابتي جګړې ته لار هواره نه کړي،چې په پایله کې به یې ټوله سیمه وسوزي.»
متقي زیاته کړه:« هغه چا چې په ازبکستان باندې بد نیت درلود،هغه مو ونیول،په سزا مو ورسول. د افغانستان خاوره نه د چا پرضد ونه کارول شي او نه موږ چاته د دې اجازه ورکوو،چې د بل پرضد د افغانستان خاوره وکاروي. دا مو په ثبات هم رسولې او په خپله ژمنه ولاړ هم یو.»
افغانستان چې له یوې اوږدې او نیابتي جګړې تازه راوتلی دی،په تیرو څلور لسیزو کې دا لومړی ځل دی،چې ټول افغانستان د یوه واحد مرکزي حکومت له لوري اداره کیږي،خو نړۍ،سیمې،ګاونډیو او د بشر حقونو مدافع بنسټونو پر افغان ولس هر ډول سیاسي او اقتصادي بندیزونه لګولي دي.
