په نږدې څو میاشتو کې به افغانان د باعزته سولې څښتنان شي.
د سولې عالي شورا باور لري چې د افغان سولې په تړاو اوس په سیمه نړۍ کې همکاري زیاته شوي او تمه شته چې ژر دا پروسه بریالۍ شي.
د سولې شورا د سولې پروسې پروړاندې په کور دننه ځینو اختلافاتو باندې انديښنه لري چې باید له منځه لاړ شي.
په تیرو ۱۷ کلونو کې په نړیواله کچه یو فکر و چې طالبان به په زور مات شي ، خو اوس د نړۍ ځواکمن هېوادونه په دې باور دي چې له سولې پرته بله لار نه شته.
دا څرګندونې د سولې عالي شورا د درالانشاء لپاره د نوي رییس عمرداوودزي په غونډه وشوې.
عمر داودزي که څه هم د کوم هېواد نوم وانه خیست خو اشاره یې پاکستان ته وه چې د افغانستان په تړاو تګلاره او سیاست کې یې مثبت تغیر لیدل کېږي.
د سولې شورا د هر هغه هېواد هر کلی کوي چې د سولې له پروسې سره مرسته کوي، خو د سولې پروسه باید د افغانانو په مشرۍ وي.
سولې شورا د خبرو په درشل کې په دې کار کوي چې څنګه کیدای شي طالبان د سولې له پروسې سره له یو ځای کیدو وروسته ګډ کار وکړي.
د سولې عالي شورا په کور دننه د سولې پروسې لپاره په یو واحد نظر ټینګار لري.
اوس چې حکومت له طالبانو سره د مخامخ خبرو لپاره عالي مشورتي بورډ جوړ کړی، د سولې شورا وایي، په بورد کې به ځینې بدلونونه راشي او په اجرایوي اړخ به یې هم بحث وشي.
اوس دا بورد مشورتي دی او هیڅ اجرایوي صلاحیت نه لري.
