په شمال بلخ ولایت کې يو شمېر ښځېنه سوداګرې او هټيوالې وايي،سوداګريزې چارې يې ټکنۍ شوي او له حکومته غوښتنه کوي،چې اسانتياوې ورته برابرې کړي.
مزارشريف کې د رابعه بلخي په نوم د ښځو د ځانګړي بازار مسووله حبیبه امیني وايي، پخوا به مېرمنو ته د سوداګريزو چارو او تجارت د ودې په اړه مشورتي پروګرامونه هم جوړېدل،چې اوس مهال دغه لړۍ درېدلې ده.
اميني زیاته کړه:« له تحولاتو وړاندې په دغه بازار کې د مېرمنو کارو بار ډېر ښه وو، د ښځينه صنعتکارانو د توليداتو لپاره به نندارتونونه جوړېدل، دوی لپاره به مشورتي سيمينارونه هم داېرېدل،اوس مهال دغسې يو څه نه شته دی او ښځينه سوداګرې د کوم ارګان له خوا نه حمایه کېږي.»
په ورته مهال يو شمېر ښځينه هټيوالې هم د خپل کاروبار له ټکني کېدو شکايت کوي او وايي،د پېر او پلور کچه يې راټيټه شوې ده.
دوی له مسوولو ادارو غواړي، چې د ستونزو په حل کې ورسره مرسته وکړي.
سوداګره بي بي حاجي مجيدي وايي:« پېر او پلور نشته، موږ يې له يوې مخې خرڅوو او خورو يې، که حالت همداسې روان وي موږ مجبوره يو چې نور مال رانوړو، ځکه د دوکارن کرايه نشو پوره کولی يا هم تاريخ تېره کېږي او بيا يې څوک نه اخلي.»
مزار شریف ښار کې یوه هټۍ واله حليمه وايي:«زما غوښتنه دا ده،چې مېرمنو ته دې د کار زمينه برابره شي،تر څو ښځې هم کار وکړي او د خپلې کورنۍ په اقتصاد کې سهم واخلي.»
له دې سره د بلخ سوداګرۍ خونه مرستیال محمد حسن انصاري هم د ښځينه سوداګرو او هټيوالو ستونزې د تائيد وړ بولي او پرحکومت غږ کوي،چې دې برخه کې رامنځته شوې ننګونې دې حل کړي.
انصاري زیاته کړه:«موږ ښځينه سوداګرې لرو،چې د کار جواز لري او ان خپل توليدات يې بهرنيو هېوادونو ته هم صادر کړي. هېله من يم،چې اسلامي امارت به سوداګرو مېرمنو ته د کار زمينه برابره کړي.»
