له هېوادونو سره د اړیکو پراخولو د هڅو پر دوام، تازه د بهرنیو چارو وزارت سرپرست مولوي امیرخان متقي د یوه لوړ پوړي پلاوي پر مشرۍ ایران ته تللی.
ټاکل شوې په دې سفر کې متقي د تهران خبرو اترو په فورم کې د ګډون ترڅنګ د دوه اړخیزو اړیکو د پیاوړتیا په موخه له ايراني چارواکو سره لیدنې ولري.
د بهرنیو چارو وزارت مرستیال ویاند ضیا احمد تکل وايي: « د افغانستان اسلامي امارت د بهرنيو چارو وزير محترم مولوي امير خان متقي د ايران اسلامي جمهوریت د بهرنيو چارو وزير محترم ډاکټر سيد عباس عراقچي په رسمي بلنه هغه هېواد ته روان شو. په دې پلاوي کې چې د اقتصاد وزارت مرستيال ډاکټر عبداللطيف نظري هم شامل دی، په پام کې ده چې د هېواد د بهرنيو چارو وزير تهران د خبرو اترو فورم کې د ګډون ترڅنګ خپل ايراني سيال او نورو لوړ پوړو چارواکو سره هم وګوري او پر دوو اړخيزو اړيکو خبرې وکړي.»
د «تهران خبرو اترو فورم» د روانې زېږدیزې میاشتې پر ۱۸مه او ۱۹مه په ایران کې ترسره کېږي. ټاکل شوې متقي په دې دوه ورځنۍ ناسته کې له ګډون وروسته چین ته هم سفر ولري.
د یادو شویو موخو ترڅنګ، ایران او چین هېوادونو ته د سفر نورې موخې د اقتصادي او سوداګریزو اړیکو وده، د افغان کډوالو او سرحدونو مسایل، ګډې سیمه ییز پروژې او د افغانستان او ایران ترمنځ د امنیتي، سیاسي او ډېپلوماټیکو اړیکو پياوړتيا پر سر خبرې اترې بلل شوې دي.
د سیاسي چارو شنونکی محمد سلیم پیګیر وايي: « ایران ته د ښاغلي متقي سفر د افغانستان له اسلامي امارت سره د ایران د تعامل نښه او دغه راز په نړیواله ناسته کې د افغانستان د پلاوي ګډون هم څرګندوي چې لاهم نړیواله ټولنه د افغانستان د خلکو او اسلامي امارت غږ اوري.»
د نورو هېوادونو په پرتله ایران د افغانستان د لودېځ ګاونډي په توګه په تېرو نږدې څلورو کلونو کې داسې مهال له سرپرست حکومت سره تر یو بریده عادي اړیکې پالي چې سرپرست حکومت په دې موده کې د نړیوال تعامل او مشروعیت په لټه کې دی.
په همدې موخه، د افغانستان او ایران چارواکو په ځلونو په ایران او افغانستان کې له یو بل سره لیدلي چې وروستۍ هغه یې د تېرې سلواغې میاشتې پر ۷ مه کابل ته د ایران د بهرنیو چارو وزیر سید عباس عراقچي سفر و.
د سیاسي چارو شنونکی عزیز معارج وايي: « دا سفر د دې نمایندګي کوي چې افغانستان په ډېپلوماټیک او بهرني سیاست کې بریالیتوب ترلاسه کړی او په سیمه هم اغېز کوي. له دې سربېره چې دوی به تر ډېره پر اقتصادي، سوداګریزو او ټرانزیټي مسایلو خبرې وکړي، خو په سیاسي مسایلو هم خبرې کېږي او ښايي ځینې پروټوکولونه هم لاسلیک کړي. په سیمه او نړۍ کې وروستي سفرونه او په ځانګړې توګه منځني ختیځ ته شوي سفرونه او دغه راز افغانستان ته د روسیې ازبېکستان او چین د استازو راتګ ته په کتو، له سیاسي پلوه هم ډېر زیات اهمیت لري.»
د سیاسي چارو شنونکی معین ګل څمکنی وايي: « د حکومت بهرنۍ پالیسي چې هغه متوازنه، بېطرفه او اقتصادي محوره پالیسي ده، هېڅ هېواد باید له دې وېره ونه لري. موږ بله لار نه غوره کوو، زموږ همدا لاره ده چې له ټولو هېوادونو سره اوږه په اوږه د سیمې د ثبات لپاره کار کوو.»
له دې وړاندې بهرنیو چارو وزرات سرپرست د جمعې په ورځ د هند له بهرنيو چارو وزير سوبرامانیم جی شنکر سره هم ټیلیفوني خبرو کې پر دوه اړخیزو اړیکو او د همکارۍ پر پراختیا غږېدلی و.
ایران ته د بهرنیو چارو وزارت سفر داسې مهال دی چې ټاکل شوې مولوي امیرخان متقي روانه اوونۍ چین او یو شمېر نورو هېوادونو ته هم سفرونه ولري، خو تر دې دمه له چین پرته کوربه هېوادونو نومونه او د سفر اجنډا او موخې نه دي په ډاګه شوې.
