د ژغورنې نړيوالې کمېټې(آی.سي.آر.سي) د مالوماتو له مخې، يوازې د تورخم پڼدغالي ته په ورځني ډول له ۴ تر ۵ زره افغانان له پاکستان را اړول کېږي چې د يادې کمېټې په خبره، په پنډغالي کې د خدمتونو کمښت او د ډېرې ګڼې ګوڼې له امله، ستونزو سره مخ دي.
د هندوستان شفقانه ورځپاڼې د ملګرو ملتونو د کډوالو سترې کمېشنرۍ چارواکو له قوله ويلي، په رضاکارانه توګه افغانستان ته د دغو کډوالو ستنېدو لپاره د شرايطو برابرول مهم دي او له همدې کبله يې له نړيوالې تولنې غوښتي چې د کډوالو ملاتړ لپاره خپلې هڅې لا چټکې کړي.
د ملګرو ملتونو د کډوالۍ سترې کمېشنرۍ عملیاتي مرستیال رووف مازو ویلي: « نړیواله ټولنه باید د اوږدمهاله بې ځایه کېدو د وضعیت کنټرولولو لپاره نوي مشارکتونه رامنځته کړي او نوې لارې چارې غوره کړي. افغانستان ته د بېرته ستنېدو شرایطو برابرول ضروري دي، ترڅو په راتلونکي کې د افغان کډوالو د دوامدارو او رضاکارانه ستنېدو زمینه برابره شي.»
په ورته وخت کې د سیاسي چارو شنونکي پر پاکستان نیوکه کوي چې تل یې د افغان کډوالو حقونه نقض کړي او هڅه یې کړې چې د کډوالۍ په برخه کې د نړیوالو قوانینو خلاف عمل وکړي.
د سياسي چارو شنونکی ابو الحسن صالحي وايي: « په پاکستان کې شته افغان مهاجران له هر پلوه بد وضعیت کې دي او هره ورځ یې ستونزې نورې هم ډېریږي. نړیواله ټولنه باید په پاکستان کې د افغان مهاجرو وضعیت ته خپله پاملرنه ډېره کړي او د کډوالو په چارو کې د ملګرو ملتونو ستر کمېشنر غوښتنو ته توجه وکړي، غوښتنې یې ومني او هغه پناه غوښتونکي باید درېیمو هېوادونو ته ولېږدول چې په پاکستان کې منتظر دي.»
د سیاسي چارو شنونکی خلیل احمد نادم وايي: « د نړیوالو قوانینو پر بنیاد باید پاکستان یو بل هېواد مهاجر په زور ونه باسي، خو پاکستان دغه کار کوي او زرګونه مهاجر یې له خپلې خاورې افغانستان ته واستول. دوی نه یوازې مهاجر و ایستل بلکې د هغوی شتمنۍ یې هم ترې وګرځولې. ملګري ملتونه او د کډوالو نړیوال سازمان ژمن دی چې باید د دوی لپاره یوه حل لاره پیدا کړي.»
دا په داسې حال کې ده چې له پاکستانه راستانه کړای شوي ډېری افغانان د کډوالو په پنډغالو کې اوسېږي او سرپرست حکومت هڅه کوي چې د ثبت او راجسټر اړوند پړاوونو له طی کولو وروسته يې خپلو مېنو ته د مېشتېدنې په موخه ولېږي.
