پاکستان د روانې اپریل میاشتې له لومړۍ نېټې د افغان کډوالو د اخراج دویم پړاو پيل کړی او په لړ کې یې لسګونه زره افغانان د تورخم او سپین بولدک له لارو افغانستان ته په جبري توګه واړول.
د اسلامي امارت حکومتي سرچینې وايي، په جبر راستانه شوي کډوال د سرپناه، روغتیا او خواړو له ستونزو سره مخ دي.
د چارواکو په خبره، د افغانانو د اخراج لړۍ نه یوازې د پاکستان بلکې د ایران او ترکیې هېوادونو له لوري هم پيل شوې ده.
د کډوالو او راستنېدونکو چارو وزارت ویاند عبدالمطلب حقاني وايي، د روانې اپریل میاشتې له لومړۍ نېټې د افغان کډوالو د شړلو په دویم پړاو کې له پاکستانه ۷۸ زره تنه، له ایران ۱۹ زره تنه او له ترکیې ۷۱۰ تنه افغانان اخراج او افغانستان ته اړول شوي دي.
حقاني په دې اړه وايي:«د اپريل له اول تاریخ تر ۲۱ تاریخه پورې ۹۸ زره ۵۶۵ تنه مهاجرین له ګاونډیو هېوادونو خپل هېواد ته راستانه شوي دي. له دې ډلې ۷۸ زره ۱۷۰ تنه له پاکستان، ۱۹ زره ۴۸۵ تنه له پاکستان او ۷۱۰ تنه له ترکیې هېواد څخه خپل هېواد ته راغلي.»
د کډوالو وزارت ویاند په خبره، په تورخم کې له پاکستانه راستنېدونکو افغانانو ته د سرپناه، روغتیا او خوړو په برخو کې اړینې اسانتیاوي برابرې شوې دي.
د حقاني په خبره، تېرو ۲۱ ورځو کې د پاکستان له بېلابېلو بندخونو هم شاوخوا ۲زره افغانان آزاد او هېواد ته رالېږدول شوي دي.
حقاني په دې اړه وايي: « په ورته مهال، ۱ زر ۹۱۵ تنه زندانیان د پاکستان له مختلفو زندانونو راخوشي شوې او د تورخم او سپین بولدک له لارې خپل هېواد ته راستانه شوې دي. دغو راستنو شویو مهاجرینو ته د هېواد په فرضي او سرحدي سیمو کې د نغدي، خوراکي او غیر خوراکي توکو مرستو ترلاسه کولو وروسته، د ټرانسپورټ زمینه برابره شوې او خپلو سیمو ته رسول شوي دي.»
د سرپرست حکومت چارواکو په خبره، له راستنېدونکو کډوالو سره د پاکستاني پولیسو د ناوړه چلن او یا ترې د سامانونو او د کورنیو د غړیو ایسارولو ستونزې يې له پاکستان سره شریکې کړې دي.
د کډوالو د حقونو فعالان او د سیاسي چارو شنونکي له پاکستانه د افغان کډوالو اجباري ایستل د ټولو نړۍ والو کنوانسیونونو خلاف عمل ګڼي.
د کډوالو د حقونو مدافع عبدالرازق عدیل وايي: « له بده مرغه د افغان مهاجرانو وضعیت به له دې ښه نه شي، ځکه چې پاکستان او ایران خپله په سیاسي او اقتصادي ستونزو کې ښکېل دي.»
د سیاسي چارو کارپوه مرتضی مطهري وايي: « د مهاجرو کورنیو غړي، مالونه او شتمنۍ په دغو هېوادونو کې پاتې کېږي چې دا خپله د کډوالۍ له قوانینو او له بشري حقونو سرغړونه ده.»
بله خوا، د ایران کورنیو چارو وزیر ويلي، د بهرنیو وګړو ایستل د ايران د خلکو له مهمو غوښتنو دي او په خبره يې، د دوی موجوديت د دې هېواد له اصلي وګړو کاري فرصتونه اخیستي دي.
سکندر مومني زیاته کړې، تېر کال له یو میلیون او۲۰۰ زرو څ ډېر ناقانونه بهرني وګړي له ايران اخراج کړای شوي چې ډېره برخه يې افغانان وو.
