دا خبره اوس معمول ګرځېدلې چې هر اختر کې کورنۍ او لویان خپلو ماشومانو ته د ساعت تېرۍ لپاره پلاستیکي وسلې او پټاقۍ اخلي.
د لوبو دا توکي د افغانستان توليد نه دی بلکې له پاکستان او چين واردېږي.
دا چې کوچني اختر ته یوازې څو ورځې پاتې دي، د پلازمېنې کابل په دې څنډې کې د شپې ناوخته ماشومان د پټاقیو پرالوځولو لوبې کوي.
خو دا په داسې حال کې ده چې ډېره کله ماشومان د فټاقيو الوځولو له امله ټپي کېږي هم.
د کابل ښار اوسېدونکی عبدالباسط وايي: «له اسلامي امارت غوښتنه کوم د پټاقیو او پلاستیکي وسلو مخه ونیسي، ځکه چې بدن او سترګو ته زیان اړوي.»
د کابل ښار یو بل اوسېدونکی مسیح وايي:« موږ باید د پټاقیو او وسلو په ځای ماشومانو ته قلم او کتابچه ورکړو.»
د کابل ښار ځینې اوسېدونکي بیا په ښار کې د ماشومانو له خوا د پټاقیو الوځولو له امله شکایت کوي او وایي، سرپرست حکومت دې د دغو شیانو د وارداتو مخه ونيسي او له امنیتي بنسټونو دې وغواړي چې د لوبو د دغه ډول توکو واردول بند کړي.
د کابل اوسېدونکی مایل رسولي وايي: « په تېر روژه ماتي کې یې دلته زما دوکان ته پټاقۍ واچوله، ما یې سړی پیدا نه کړ، کنه ترمنځ مو جګړه پېښېده.»
د کابل ښار اوسېدونکی پروېز عظیمي وايي: « خلک ګڼې ستونزې لري، په چرت او فکر کې روان وي چې یو دم یې له مخ سره پټاقۍ چوي. دا ناسم کار دی، باید په ګمرکونو کې یې د وارداتو مخه ونیول شي، ځکه دا خلکو ته زیات مزاحمت کوي.»
د کابل اوسېدونکی قدرتالله کاظمي وايي: « له اسلامي امارت غوښتنه کوم چې د دې پټاقیو او پلاسټیکي وسلو مخه ونیسي.»
له بلې خوا، د كابل امنيې قوماندانۍ مسوولین بيا له خلكو غواړي چې ماشومانو ته د پټاقيو له اخيستلو په ډډې کولو سره د عامه نظم د خلال مخنيوی وکړي.
دوی پر دې هم ټينګار کوي چې د پلاستیکي وسلو او پټاقيو پلورونکي دې د يادو توکو له خرڅلاوه ډډه وکړي، کنه له قانوني چلن سره به مخ شي.
د کابل امنیې قوماندانۍ ویاند خالد ځدراڼ وايي:« د کابل امنیې قومانداني یوځل بیا ټولو هېوادوالو ته خبر ورکوي چې خپل ماشومان له هوايي ډزو، پلاستيک وسلو کارولو او پټاقیو الوځولو سره په کلکه منع کړي. دوکاندارانو، تجارانو ته هم په کلکه خبرداری ورکوو چې باید د پلاسټیکي وسلو او پټاقیو له پلور او پېرلو په کلکه ډډه وکړي. د سرغړونو په صورت کې به قانوني چلن ورسره کېږي او بیا به د شکایت حق نه لري.»
هرکال د اختر په شپو ورځو او دغه راز نورو ملي ورځو او مېلو کې پلاستیکي وسلې، پټاقۍ او نور غږ او اور تولیدوونکي توکي په ماشومانو پلورل کېږي چې ډېر کله د همدغو ماشومانو د ژوبلېد او اورلګېدونو لامل هم شوي دي.
